Боксын эмэгтэйчүүдийн насанд хүрэгчдийн ДАШТ-ээс Монголын тамирчид түүхэндээ анх удаа хоёр медаль хүртэх нь тодорхой болоод байна. Манай тамирчдаас 54 кг-д М.Энхжаргал хүрэл медаль хүртэн, Л.Алтанцэцэг аваргын төлөө шалгараад буй.

Насанд хүрэгчдийн Азийн АШТ-ий хүрэл медальт, үндэсний шигшээ баг, “Аврагч” спорт хорооны боксчин тэрбээр хүрэл медалийн төлөө Узбекистаны Ф.Фозиловаг 5:0-ээр ялсан.

Улмаар хагас шигшээд Мароккогийн боксчин, Африк тивийн аварга Ясмин Моутактитай өрсөлдөн мөн 5:0-ээр ялж, мөнгөн медалийн болзол хангасан юм. Ингэснээр Л.Алтанцэцэг Монголын эмэгтэй боксчдын түүхэнд ДАШТ-ий шигшээд анх удаа шалгарлаа.

Тэрбээр дэлхийн аваргын алтан медалийн төлөө Энэтхэгийн боксчин Ниту Гэнгэстэй өрсөлдөнө. Энэтхэг боксчин 22 настай, дэлхийн аваргаас Л.Алтанцэцэгийн адил анхны медалиа хүртэж буй. Хамтын нөхөрлөлийн наадамд өнгөрсөн жил түрүүлснийг нь эс тооцвол төдийлөн том амжилтгүй.

Л.Алтанцэцэг Монголын боксын спортоос мэндэлсэн анхны эмэгтэй дэлхийн аварга болоход ганцхан даваа үлдлээ. Дэлхийн аваргын төлөөх тулаан өнөөдөр 20.30 минутад болно, Premier Sports телевиз шууд дамжуулна.

ДАШТ-д Монголын шигшээ багийн 8 тамирчин оролцсоноос

1. -50 кг жинд Б.Мөнгөнсаран Туркийн тамирчныг ялж шигшээ 32-т шалгарсан, шигшээ 32-т Испанийн тамирчинд ялагдаж тэмцээнээ дуусгасан
2. -52 кг жинд О.Есүгэн Тайландын тамирчныг ялж, шигшээ 16-д Мозамбикийн тамирчныг ялж шөвгийн наймд шалгарсан
3. -50 кг жинд М.Намуун Колумбийн тамирчинд ялагдаж тэмцээнээ дуусгасан
4. -54 кг жинд М.Энхжаргал Вьетнамын боксчныг ялж шигшээ 32-т шалгарсан, Мароккогийн тамирчныг ялж шигшээ 16-д шалгарсан, Бразилын тамирчныг ялж шөвгийн наймд шалгарсан, Италийн боксчныг ялж хүрэл медалийн болзол хангасан, Колумбийн тамирчинд ялагдаж хүрэл медаль хүртсэн
5. -60 кг жинд Т.Номин-Эрдэнэ Японы тамирчинд ялагдаж тэмцээнээ дуусгасан
6. -48 кг жинд Л.Алтанцэцэг Францын тамирчныг ялж шигшээ 16-д шалгарсан, Хятадын тамирчныг ялж шөвгийн наймд шалгарлаа, Узбекистаны тамирчныг ялж хүрэл медалийн болзол хангасан, Мароккогийн боксчныг ялж мөнгөн медалийн болзол хангасан. Мөнгөн медалийн төлөөх тулаанд өрсөлдөгчөө 5:0 харьцаагаар ялж алтан медалийн төлөөх тулаан хийхээр боллоо.
7. -66 кг жинд М.Цэцэгдарь Японы тамирчныг ялж шигшээ 16-д шалгарав, шөвгийн наймын төлөөх тулаанд ялагдаж тэмцээнээ дуусгав
8. -63 кг жинд У.Шинэцэцэг Францын тамирчинд ялагдаж тэмцээнээ дуусгасан.