Багш нарыг орон сууцжуулах “Ногоон Хөгжил үндэсний нэгдэл” ХХК, “Шинэ зуун зөвлөлдөх зөвлөл” ТББ-ын хамтран хэрэгжүүлж буй хувьцаат орон сууц төсөл, хөтөлбөрт хамрагдсан хүмүүс хохирсон тухай асуудал үүсээд буй. 

Энэ асуудлыг үгүйсгэж “Ногоон хөгжил үндэсний нэгдэл” ХХК-ийн гүйцэтгэх захирал Д.Санжаа, Монголын багш нарын “Шинэ зуун зөвлөлдөх зөвлөл” НҮТББ-ын ТУЗ-ийн дарга н.Цэрэндолгор, тус НҮТББ-ын гүйцэтгэх захирал агсан С.Сарантуулын охин нар мэдээлэл хийлээ. 

“Ногоон хөгжил үндэсний нэгдэл” ХХК-ийн гүйцэтгэх захирал Д.Санжаа:

-Өнгөрсөн 7 хоногт хоёр иргэн манай хэрэгжүүлж буй төсөл, хөтөлбөртэй холбоотой алдаатай мэдээлэл хийсэн. Үүнийг залруулахаар мэдээлэл хийж байна. Манай компани болон “Шинэ зуун зөвлөлдөх зөвлөл” НҮТББ-тай 2020 оноос хойш хамтран ажиллаж байна. Бид 5000 багшийг орон сууцжуулахаар “Хувьцаат орон сууц” төсөл хөтөлбөрийг хэрэгжүүлж байгаа. Нэгдүгээр үе шат амжилттай дуусаад 100 гаруй багш орон сууцандаа орсон, хоёрдугаар үе шат удахгүй эхэлнэ.

Монголын багш нарын “Шинэ зуун зөвлөлдөх зөвлөл” НҮТББ-ын ТУЗ-ийн дарга н.Цэрэндолгор:

-Бид багш нарынхаа төлөө зүтгэсээр ирсэн. Эхлээд багш нарын цалинг нэмүүлэхээр ажилласан. Мөн орон сууцны асуудлыг шийдэх ёстой юм байна гэдэгт санал нэгдсэн. Бид явсаар Монголын багш нарын 7 дугаар их хурлыг хийлгэх нь, тулгамдсан асуудлыг хэлэлцэх нь зөв юм байна гэж шийдсэн. Энэ хурлаар 41 асуудлыг хөндөхөд багшийг орон сууцжуулах ажил хамгийн их санал авсан юм. Энэ асуудлын араас бид явсан. Олон байгууллагад хандсан, Ерөнхий сайд, Ерөнхийлөгчид, Нийслэлийн орон сууцны корпорацад ч хандсан.