"Катар 2022" ДАШТ-ий F хэсгийн хоёр дахь тоглолт Бельги болон Канадын шигшээ багийн хооронд болоход Бельги 1-0 харьцаагаар хожлоо.

Хоёр дахь дэлхийн аваргадаа оролцож буй Канадын шигшээ баг ширүүн довтолгоогоор тоглолтыг эхлүүлж торгуулийн цохилтын эрх авсан. Торгуулийн цохилтыг Канадын довтлогч Алфонзо Дэвис цохисон ч Улаан чөтгөрүүдийн хаалгач Тибо Куртуа хаалаа.

Энэ удаагийн ДАШТ-д торгуулийн цохилт хаасан хоёр дахь хаалгач Куртуа болов. Түүний өмнө Мексикийн хаалгач Гилермо Очоа Польшийн довтлогч Роберт Левандовскигийн цохилтыг хаасан билээ.

Канадын довтолгоо тоглолтын турш амжилттай болж удаа дараа цохиж байсан ч гоол болсонгүй. Харин цөөн цохисон Бельгийн боломжууд зорилгодоо хүрч эхний үеийн төгсгөлд Миши Матшуай тооны харьцааг нээлээ.

2018 оны дэлхийн аваргын хүрэл медальт Бельгийн шигшээ баг ийнхүү 3 оноотой хэсгээ тэргүүлж эхлэв.