Энэ сарын 6-13-ны өдөр хүртэлх 7 хоногийн цаг агаарын тойм:

Өнгөрсөн 7 хоногт өдөртөө Увс аймгийн Тэс суманд -22.5 градус буюу хамгийн хүйтэн байсан бол Өмнөговь аймгийн Ханбогд суманд +6.7 градус хүрч хамгийн дулаан байжээ. Харин өнгөрсөн 7 хоногт шөнөдөө хамгийн хүйтэн байсан нь  Завхан аймгийн Отгон суманд -41.5 градус, хамгийн дулаан нь Өмнөговь аймгийн Гурвантэс суманд -12.4 градус хүйтэн хоножээ.

Агаарын хамгийн их температур: Увс нуур болон Дархадын хотгор, Завхан, Идэр, голын хөндийгөөр -23...-28 градус, Хангай, Хөвсгөл, Хэнтийн уулархаг нутаг, Хүрэнбэлчир орчим, Тэс, Байдраг, Ерөө голын хөндийгөөр -17...-22 градус, говийн бүс нутгийн өмнөд хэсгээр 0...+6 градус дулаан, говийн бүс нутгийн хойд хэсэг болон цас багатай энгэр ээвэр газраар -1...-8 градус, бусад нутгаар -9...-16 градус хүйтэн байв. 7 хоногийн хамгийн дулаан нь Өмнөговийн Ханбогд суманд +7 градус дулаан байжээ.

Агаарын хамгийн бага температур: Идэр голын хөндийгөөр -38...-42 градус, Увс нуур болон Дархадын хотгор, Хөвсгөлийн уулархаг нутаг, Завхан голын эх, Байдраг, Тэс голын хөндийгөөр -32...-37 градус, Хангай, Хэнтийн уулархаг нутаг, Хүрэнбэлчир орчим, Эг, Үүр, Орхон, Хараа, Хэрлэн, Туул, Тэрэлж, Халх голын хөндийгөөр -26...-31 градус, говийн бүс нутгийн хойд хэсэг болон цас багатай энгэр ээвэр газраар -13...-18 градус, говийн бүс нутгийн өмнөд хэсгээр -6...-12 градус, бусад нутгаар -19...-25 градус хүйтэн хоносон.

Cалхи: Энэ сарын 6-нд говийн бүс нутгаар секундэд 7-12 метр, 7-нд тал хээрийн нутгаар секундэд 9-14 метр,  8, 9, 10-нд Монгол-Алтайн уулархаг нутгаар секундэд 8-12 метр, 11, 12-нд говийн бүс нутгийн өмнөд хэсгээр секундэд 10-14 метр, зарим үед 16-18 метр хүрч ширүүсэж, шороон шуурга шуурсан байна.

Эх сурвалж: ЦУОШГ