#CS2 мажорын дараа орох хамгийн том тэмцээний шилдэг зургаад шалгарч Ази багуудын хүрээгүй дахин нэгэн шинэ амжилтыг тогтоов.

ESL-ээс жил бүр зохиодог CS2 (Counter Strike 2)-ын томоохон тэмцээнүүдийн нэг "Intel Extreme Masters Katowice 2025" Польшийн Катовиц хотод үргэлжилж байна.

$1,000,000 шагналын сантай тэмцээнд Монголын "The MongolZ" баг дэлхийн чансаанд эзэлж буй байраар хэсгийн шатанд шууд уригдсан.

Тэд өнөөдөр хэсгийн шатны хоёр дахь тоглолтоо Шведийн Эрик "ztr" Густафсон ахлагчтай "GamerLegion" багийн эсрэг хийж 2-0 (Nuke 13-10, Mirage 13-5) харьцаагаар хожлоо. Тоглолтод багийн ахлагч Бямбасүрэнгийн "bLitz" Гарьдмагнай 104.5 ADR (Average Damage per Round), K-D (Kill-Death) +15 үзүүлэлттэйгээр багаа тэргүүлэв.

• The MongolZ баг Mobile Legends-ийн эмэгтэй бүрэлдэхүүнтэй боллоо
• The MongolZ 2025 оны эхний тэмцээнийхээ нээлтийн тоглолтод хүндхэн хожлыг авлаа
• СПОРТЫН ЦАГЛАВАР: 2025 оны хоёрдугаар сар

Өчигдөр "Team Liquid" багийг 2-1 (Nuke 10-13, Mirage 13-8, Ancient 13-11) харьцаагаар хожоод байсан монгол залуус ийнхүү тэмцээний playoffs шатанд тоглох эрхээ авсан бөгөөд IEM цуврал тэмцээний playoffs-т шалгарсан анхны Ази баг болж нэгэн шинэ амжилтыг тогтоов.

Тэмцээний үндсэн хэсгийн шатанд дэлхийн чансааг тэргүүлэгч найман баг шууд уригдсан бол найм нь Play-In шатнаас эрхээ авсан. Хэсгийн шатанд нийт 16 баг хоёр хэсэгт хуваагдан тоглож байгаа ба хэсгээс гурван баг Playoffs шатанд шалгарч байна.

Баянбатын "maaRaa" Эрдэнэдалай дасгалжуулагчтай The MongolZ маргааш хэсгийн аваргын төлөө "Team Spirit", "Natus Vincere" багуудын хожсонтой тоглоно.