• Азийн хөл бөмбөгийн аварга шалгаруулах тэмцээний шигшээ 16 шат өндөрлөлөө
• Бахрейн 1-3 Япон: Үзэх
• Иран 1-1 (5-3) Сири: Үзэх

Азийн хөл бөмбөгийн холбооноос зохиодог Азийн аварга шалгаруулах тэмцээний шигшээ 16 шатны тоглолтууд өндөрлөлөө. Тус шатны сүүлийн хоёр тоглолт өнгөрсөн шөнө болов.

Эхний тоглолтод Япончууд Бахрейныг 3-1 харьцаагаар хожлоо. Япончууд 31 дэх минутад Рицү Доаны гоолоор тооны харьцааг нээсэн бөгөөд 49 дэх минутад залуу од Такэфүса Кубогийн гоолоор тэргүүллээ бататгав.

Хоёрдугаар үеийн 64 дэх минутад Бахрейнчууд тооны харьцааг ойртуулсан ч "Цэнхэр самурай" нарын мэргэн бууч Аяасэ Үэда 72 дахь минутад гоолдож Япончууд шөвгийн наймд шалгарав.

• Солонгосын шигшээ баг Саудын Арабыг торгуулийн цохилтоор хожлоо
• Катар, Йорданы шигшээ баг шөвгийн наймд шалгарч Ирак, Палестинчууд гэртээ харилаа
• Тажикистан торгуулийн цохилтоор Эмиратыг хожиж шөвгийн наймд шалгарлаа

Харин түүний дараа Азийн аваргын хүчирхэг багуудын нэг Иранчууд Сиритэй тоглож үндсэн цагт 1-1 харьцаагаар тэнцэв. Хоёр гоол хоёул торгуулийн цохилтоос орсон бөгөөд нэмэлт цагт гоол оролгүй тэнцсэнээр мөн л торгуулийн цохилтоор ялагч тодорсон. Ийнхүү 5-3 харьцаагаар Иран хожиж цааш шалгарсан бөгөөд шөвгийн наймд Японы шигшээ багтай хүндхэн тоглолтыг хийнэ.

Одоогоор Иракийн шигшээ багийн довтлогч Аймен Хуссейн 6 гоолтойгоор Азийн аваргын мэргэн буучдын жагсаалтыг тэргүүлж байгаа бол Катарын Акрам Афиф, Японы Аяасэ Үэда нар 4 гоолтой, Солонгосын Ли Кан-Ин, Йорданы Одэй Даббах, Ираны Мехди Тареми нар 3 гоолтой удаалж байна.