• Азийн хөл бөмбөгийн аварга шалгаруулах тэмцээний шигшээ 16 шат эхэллээ
• Австрали 4-0 Индонез
• Тажикистан 1-1 (5-3) Эмират

Азийн хөл бөмбөгийн холбооноос зохиодог Азийн аварга шалгаруулах тэмцээний шигшээ 16 шатны тоглолтууд өчигдөр эхэллээ.

Шигшээ 16 шатны эхний тоглолт "В" хэсгийн тэргүүн баг Австрали, "D" хэсгийн 3-р байр Индонезын шигшээ багийн хооронд болоход Австраличууд 4-0 харьцаагаар илүүрхэв. Тоглолтод Мартин Бойл, Крейг Гүүдүин, Харри Сутар нар гоол оруулж нэг гоол нь авто-гоолоор бүртгэгдэв.

• Азийн АШТ: Солонгос Малайзтай тэнцсэнээр хэсгээ тэргүүлж чадсангүй
• Азийн АШТ: D хэсгийг Япон биш Ирак тэргүүллээ
• Палестины шигшээ баг Азийн АШТ-д анх удаа хожиж хэсгээсээ гарлаа

Үүний дараа "А" хэсгийн дэд байр Тажикистан "C" хэсгийн дэд байр Арабын Нэгдсэн Эмират улсын шигшээ багууд тоглож үндсэн цагт 1-1 харьцаагаар тэнцжээ. Эхний гоолыг Тажикистаны Вахдат Ханонов оруулсан бол Эмират 90+5 дахь минутад Халифа Аль Хаммадигийн гоолоор тэнцүүлсэн.

Улмаар нэмэлт цаг сунгахад гоол ороогүй тул торгуулийн цохилтоор ялагч тодрохоор болж 5-3 харьцаагаар Тажикистан шөвгийн наймд шалгарлаа.

Өнөө шөнө 19:30 цагаас Йордан - Ирак, 00:00 цагаас Катар - Палестины шигшээ багууд тоглоно. Одоогоор Иракийн шигшээ багийн довтлогч Аймен Хуссейн 5 гоолтойгоор Азийн аваргын мэргэн буучдын жагсаалтыг тэргүүлж байгаа бол Катарын Акрам Афиф, Японы Аяасэ Үэда, Солонгосын Ли Кан-Ин нар 3 гоолтой удаалж байна.