Төсвийн байнгын хороо болон Аюулгүй байдал, гадаад бодлогын байнгын хороо дараах асуудлыг хамтран хэлэлцэнэ

1.Монгол Улс болон Азийн хөгжлийн банк хоорондын “Санхүүжилтийн ерөнхий хөтөлбөр”-ийн төсөл.

Монгол Улсын Засгийн газар Азийн хөгжлийн банктай хамтран эдийн засгийн гадаад орчны сөрөг нөлөөлөл, байгалийн гамшиг, эрүүл мэнд, эрчим хүч, хүнсний хангамжтай холбоотой онцгой нөхцөл байдлын үед шаардлагатай санхүүжилтийг шуурхай авах боломжийг бүрдүүлэх зорилгоор “Санхүүжилтийн ерөнхий хөтөлбөр”-ийг байгуулахаар ажиллаж байна.

Тус хөтөлбөрийн хүрээнд Азийн хөгжлийн банкнаас нийт 450 сая ам.доллар зээлнэ. Үүнд:

• 200.0 сая ам.доллартай тэнцэх төсвийн дэмжлэгийн зээл,
• 250.0 сая ам.доллар хүртэлх эх үүсвэртэй Болзошгүй гамшгийн үеийн зээлийн шугам багтаж байгаа юм. 

Энэхүү хөтөлбөрийн гол ач холбогдол нь Засгийн газар дээрх санхүүжилтийг бүхэлд нь шууд авч ашиглах бус, харин эдийн засгийн гадаад шок, байгалийн гамшиг болон бусад онцгой нөхцөл байдал үүссэн үед урьдчилан тохирсон нөхцөлийн дагуу санхүүжилт авах боломжтой нөөц эх үүсвэрийг бүрдүүлэхэд орших аж.

2. Монгол Улсын Засгийн газар, Япон Улсын Засгийн газар хооронд солилцох ноот бичгийн төсөл болон “Монгол Улсын Засгийн газар болон Японы олон улсын хамтын ажиллагааны байгууллага хоорондын Чингис хаан олон улсын нисэх буудлын өргөтгөлийн төслийн зээлийн гэрээ”-ний төсөл

Сангийн сайд З.Мэндсайхан “Олон улсын геополитикийн хурцадмал нөхцөл байдал нь дэлхийн эдийн засгийн тодорхой эрсдлүүд гарч ирээд байна. Эрчим хүч, хүнсний бүтээгдэхүүний нийлүүлэлт, олон улсын санхүүгийн зах зээлд нөлөөлж байна. Эдгээр гадаад хүчин зүйлс нь инфляц өсгөж, монгол улсын эдийн засагт ч тодорхой эрсдлүүдийг үүсгэж байна. Иймд гадаад нөлөөллийг бууруулах, төсөв, төлбөрийн тэнцлийн сөрөг нөлөөллийг саармагжуулах, шаардлагатай үед шуурхай ашиглах боломжтой санхүүжилтийн эх үүсвэрийг бүрдүүлэх зорилгоор Азийн Хөгжлийн Банктай хамтран 450 сая ам.долларын санхүүжилтийн ерөнхий хөтөлбөрийн төслийг хэлэлцэн боловсруулсан. 2026 оны наймдугаар сарын 19-ны өдөр Засгийн Газрын хуралдаанаар хэлэлцүүлсэн. Энэ хөтөлбөр нь 200 сая ам.долларын төсвийн дэмжлэгийн эх үүсвэр болон 250 сая ам.долларын болзошгүй гамшгийн үеийн зээлийн шугамаас бүрдэнэ.

Өнгөрсөн жилүүдэд Азийн хөгжлийн банкнаас 100 сая ам.доллар хүртэлх төсвийн дэмжлэгийн зээлийг авч ирсэн бол энэ жил 100 сая ам.доллароор нэмэхээр тохирсон. Үүнээс 50 сая ам.долларыг нэн хөнгөлөлттэй нөхцөлөөр олгоно. Харин болзошгүй зээлийн шугамын хувьд эдийн засгийн хямралын үед ашиглах санхүүжилтийн хэрэгслийг нэвтрүүлэхээр холбогдох судалгааг хийж, гэрээ хэлэлцээрийн бэлтгэл ажлыг хангаад байна.

Байгалийн гамшиг, эдийн засгийн хямрал, эрчим хүч, хүнсний хангамжийн доголдолтой холбоотой онцгой нөхцөл байдал үүсэн үед цаг алдалгүй санхүүжилтийг татах боломжтой байгаагаар онцлогтой. Санхүүжилтийн ерөнхий хөтөлбөрийн зээлийн нөхцөлийн хувьд хөнгөлөлттэй эх үүсвэрийн зээл нь тогтмол хоёр хувийн хүүтэй 25 жилийн хугацаатай, эхний таван жилд үндсэн төлбөрөөс чөлөөлөгдөнө. Энгийн эх үүсвэрийн зээл нь 15 жилийн хугацаатай эхний гурван жилд үндсэн төлбөрөөс чөлөөлөгдөхөөр байна” гэлээ.

Сангийн яамны Санхүү бодлогын газрын дарга С.Тулга  "АХБ-аас авч буй гамшгийн үед авч ашиглах зээлийн шугам маань эрхээ л нээсэн явдал юм. АХБ-тай ярилцан геополитикийн тогтворгүй нөхцөл байдлаас шалтгаалан түлш эрчим хүчний дутагдал болон хүнсний инфляцад тодорхой хэмжээний дарамт авч байна. Иймд төлбөрийн тэнцэлд тодорхой түвшин тогтоогоод биелэх тохиолдолд уг 125 сая ам.долларын зээлийг авч ашиглах боломжийг бүрдүүлээд явж байна. Уг зээлийг ДНБ-тэй хослуулан үүсгэсэн. Нийт 250 сая ам.долларын болзошгүй гамшгийн үеийн зээлийн шугамаас эхний ээлжид хагас болох 125 сая ам.долларыг ашиглаад дууссан тохиолдолд үлдэгдлийг ашиглах замаар явна" гэлээ.