"Катар 2022" ДАШТ-ий E хэсгийн хоёр дахь тоглолт Испани болон Коста Рикагийн шигшээ багийн хооронд болоход Испани 7-0 харьцаагаар хожлоо.

2010 оны дэлхийн аварга Испаничууд энэ жил авьяаслаг залуу тоглогчдоор багаа бүрдүүлсэн бөгөөд "Barcelona" клубийн хагас хамгаалалтын гурвал гараанд гарсан.

Багийн ойлголцол, тоглолтын чанар маш сайн байж эхний үед гурван гоол оруулсан. Гоолыг Дани Олмо, Марко Асенсио, Ферран Торрес нар оруулав.

Испаничууд хоёрдугаар үед ч үзүүштэй, уран тоглолтоо үзүүлсээр нэмж дөрвөн гоол оруулав. Улаан өмсгөлтүүдийн хувьд гоол оруулах амархан, Коста Рикагийн хувьд хамгаалах хүнд байлаа.

Хоёрдугаар үеийн гоолыг Ферран Торрес, Гави, Карлос Солер, Альваро Мората нар оруулсан. Төвийн хагас хамгаалалтад тоглосон 18, 19 настай Гави, Педри нар Испанийн ирээдүй болохоо баталлаа. Гави Испанийн шигшээ багийн төлөө ДАШТ-д гоол оруулсан хамгийн залуу тоглогч болов.