#CS2 MESA League Season 4 тэмцээн өчигдөр өндөрлөж "Chinggis Warriors" баг аваргалснаар MESA Nomadic Masters: Spring 2025-т оролцох эхний багаар тодров.

MESA (Mongolian Electronic Sports Association)-аас энэ онд Улаанбаатар хотод зохиох хэд хэдэн том тэмцээн төлөвлөсний эхнийх нь CS2-ын "MESA Nomadic Masters: Spring 2025" байх юм.

$250,000 (867.6 сая төгрөг) шагналын сантай уг тэмцээнд найман баг оролцохоос дөрвийг нь Valve-ын дэлхийн чансаагаар урина. Харин гурав нь Ази, Хятад, Монголын сонгон шалгаруулалт, үлдсэн нэг нь MESA-ийн өөрийн дотоодын лигийн тэмцээнээс эрхээ авах учиртай.

Тэгвэл $10,000 (34.7 сая төгрөг) шагналын сантай "MESA League Season 4" тэмцээн өчигдөр өндөрлөж "Chinggis Warriors" баг аваргалснаар MESA Nomadic Masters: Spring 2025-т оролцох эхний багаар тодров.

Тэмцээний нээлтийн тоглолтод "Nomads" багт хожигдсон ч "The QUBE Esports", "Yaarmag House" багуудыг хожин хагас шигшээд шалгарсан Chinggis Warriors баг "IHC Esports"-ыг 2-0, финалд "The Huns Esports"-ыг 3-2 харьцаагаар хожсоноор $5,000 (17.3 сая төгрөг) шагналыг авсан юм.

• The MongolZ анх удаа Vitality-ийн эсрэг map хожсон ч тэмцээнээ өндөрлүүллээ
• The MongolZ дэлхийн аварга Natus Vincere багийг гэрт нь буцаалаа
• The MongolZ гурван улирал дараалан ESL Pro League-ийн шигшээ шатанд шалгарлаа

"carnage" дасгалжуулагчтай Chinggis Warriors хоёр долоо хоногийн өмнө "PGL Bucharest 2025" тэмцээний эрх олгох "MESA Asian Masters 2025" тэмцээнд Хятадын "Rare Atom" багт хожигдон 3-р байр эзлээд байв.

Тэд маргааш буюу гуравдугаар сарын 18-д "ESL Challenger League Season 49: Asia" тэмцээний 5-р тойргийн тоглолтоо Rare Atom багийн эсрэг эхлүүлнэ.

MESA Nomadic Masters: Spring 2025 тэмцээнд оролцох Хятад болон Монголын сонгон шалгаруулалт ирэх сарын 7-8-ны хооронд болно. Харин Азийн сонгон шалгаруулалтын хуваарь тодорхойгүй байна.

Шууд урих дөрвөн багийг энэ сарын 25-ны Valve-ын чансааг үндэслэн урих аж.