Монголчууд хоёр өдөр уран гулгалтаар амьсгалав. ОХУ-ын Уран гулгалтын үндэсний шигшээ багийн тамирчид болох олимп, тив, дэлхий, ОХУ-ын аварга тамирчдын шоу тоглолт “Степпе Арена” мөсөн өргөөнд хоёр өдөр амжилттай болж өндөрлөлөө. ОХУ-ын Уран гулгалтын холбооны Ерөнхийлөгч Сихарулидзе Антон, Гүйцэтгэх захирал Александр Коган нар шигшээ багийн 17 тамирчин, зургаан дасгалжуулагчийн хамт Монголд хүрэлцэн ирсэн билээ. 

Уран гулгалтын спортын дэлхийн дээд амжилтыг эзэмшигч алдарт Камила Валиева, мөсний хатан Евгения Туктамышева, хосын төрлийн дэлхийн топ тамирчид болох Александра Бойкова, Дмитрий Козловский, Евгегия Тарасова, Владимир Морозов нарын шилдгүүдээс бүрдсэн уран гулгалтын шоу тоглолтын тасалбар худалдаанд гараад удалгүй дууссан бөгөөд мөсөн талбайн суудал хоёр өдөр үзэгчдээр дүүрэн байв. 

Дэлгэцээр харж шүтэн биширч ирсэн уран гулгалтын дэлхийд супер одуудыг дэргэдээс нь  харах боломж монголчуудад олдсон нь энэ ээ. 

МОНГОЛЫН АНХНЫ МЭРГЭЖЛИЙН УРАН ГУЛГАГЧ О.МИШЭЭЛ МӨСӨН ШОУГ НЭЭВ

Оросын уран гулгагчид улс орнуудын урилгаар шоу тоглолтуудыг зохион байгуулдаг. Аль ч улсад шоу хийсэн тухайн улсынх нь уран гулгагчийн үзүүлбэрээр тоглолтыг нээдэг уламжлалтай аж. Энэ уламжлалын дагуу Монголын анхны мэргэжлийн уран гулгагч Отгонбаатарын Мишээл мөсөн шоуны эхний үзүүлбэрийг тавилаа. Найм дахь жилдээ энэ спортоор хичээллэж буй О.Мишээл АНУ-д сурч, амьдардаг бөгөөд 2019 онд АНУ-ын бүсийн аварга шалгаруулах тэмцээнд амжилттай оролцсон. 2020 онд мужийнхаа аварга шалгаруулах тэмцээнээс алтан медалийн эзэн болсон монгол охин Indila “Love story” дуун дээр үзүүлбэрээ дэглэлээ.



Дэлхийн шилдэг уран гулгагчидтэй нэг тоглолтод оролцож буй монгол охины мөсөн дээрх замнал, гайхалтай карьерийн амжилттай эхлэл энэ байгаасай хэмээн үзэгчид баяр хүргэж, халуун алга ташилтаар урам зориг өгсөн юм. 



ОХУ-ЫН ШИНЭ ОД, 14 НАСТАЙ АДЕЛИЯ ПЕТРОСЯН

ОХУ-ын Уран гулгалтын холбооныхон тамирчдаа сонгохдоо мөсөн талбай дахь энэ цагийн супер одуудаас гадна ирээдүйд цахиур хагалах шинэ одуудаас оруулжээ. Тэдний нэг нь 2023 оны ОХУ-ын аварга Аделия Петросян. 14 настай энэ охин алдарт Этери Тутберизе-гийн танилцуулж буй ээлжит нэгэн шинэ од. Петросян гурвалсан аксель, тулуп гэх мэт хүнд элементүүдийг төвөггүй хийж, уран гулгалтын ертөнцөд өөрийн орон зайг эзлэх цаг ойртож буйг чадварлаг үзүүлбэрээрээ харууллаа хэмээн хөтлөгч дүгнэж байв.  



Уран гулгалтын ертөнцөд шуугиан тарьсан бас нэгэн шинэ тамирчин Степпе Арена-д гайхамшгийг үзүүлсэн нь мөн л Этери Тутберизе, Сергей Дудаков нарын шавь 15 настай Софья Акатьева. ОХУ-ын 2023 оны аварга 15 настай, 151 см өндөр Софья Акатьева өсвөрийн ангилалд уран гулгалтын чөлөөт үзүүлбэрээр Камила Валиевагийн рекордыг эвдэж, дээд амжилт тогтоож, шуугиан тарьжээ. 



Гялтганасан цайвар даашинзтай Софья Акатьева Даниел Пембертон-ы “Welcome to earth” дуунд дэлхийн бөмбөрцөг тойрон бүжих нь эмзэг агаад эрхэмсэг. Софья Акатьева уран гулгалтын үсрэлт, эргэлт, хурд, гоо сайхныг илтгэсэн бүх үзүүлбэрээ төгс гүйцэтгэсэн. 



Явган суугаа байдлаас арагшаа унаж гулгах үзүүлбэрийг ямар ч түвэггүй хийсэн бөгөөд энэ үзүүлбэр нь түүний нэрийн хуудас болж байгааг хөтлөгч, тайлбарлагчид онцолж байв. 

ОХУ-ын Уран гулгалтын холбооны ерөнхийлөгч Ерөнхийлөгч Сихарулидзе Антон “Бид уран гулгагчдын ур чадварыг сорьсон хамгийн чансаатай үзүүлбэрүүдээ Монголын үзэгчдэд хүргэх болно” хэмээн амласандаа хүрч монголчууд бидэнд дэлхийн хэмжээний өндөр түвшний шоу үзүүллээ хэмээн онцолсныг энд тэмдэглэх ёстой. 

Хэдийгээр Монголд уран гулгалт хөгжөөгүй ч Оросын уран гулгалтын шигшээ багийнхан “Степпе Арена”-гийн концертдоо ач холбогдол өгч, хоёр монгол дуун дээр үзүүлбэр бэлдсэн нь үзэгчдэд сюрприз болж чадлаа. 

Эхнийх нь Гавьяат жүжигчин, дуучин Б.Сарантуяагийн “Амьдрал” дуун дээр Бээжин-2022 өвлийн олимпын хосын төрлийн хүрэл медаль, багийн алтан медальт, Европын аварга, Дэлхийн аварга, Франц, Япон, ОХУ-ын уран гулгалтын АШТ-ий аварга, дэлхийн шилдэг уран гулгагч хосын нэг Анастасия Мишина, Александр Галлямов нар гэгээн хайрын түүхийг мөсөн дээр сийлж, монголчуудад бэлэг барив. Сараагийн дууг дахин шинээр амилуулав. 



Оросын талаас “Монгол дуун дээр хоёр үзүүлбэр бэлдэж байгаа“ гэдгээ мэдэгдсэн ч чухам ямар дууг сонгосноо тоглолт эхлэх хүртэл нууцалсан аж. Супер одууд монгол дуун дээр гулгасан нь гэнэтийн бэлэг болж чадсан. Үзэгчид дууг намуухан түрж, дэлхийд шилдэг хосод баяр хүргэсэн алга ташилт илгээж байв. Монгол Улс дэлхийн стандартад нийцсэн мөсөн өргөөтэй болж, уран гулгалтын шоуг эх орондоо анх удаа үзэж байгаа нь энэ учир бидэнд мэдэхгүй зүйл их.

Үзэгчид хамгийн их таалагдсан үзүүлбэрийн дараа уран гулгагчид баяр хүргэж мөсөн талбай руу зөөлөн тоглоом шиддэг, цэцгийн баглаа бэлэглэдэг. Монголчууд бид уран гулгалт хөгжсөн орнуудынх шиг бэлтгэгдээгүй үзэгчид болох нь мэдээж. Гэвч “Амьдрал” дууг шинээр амилуулсан одууд багагүй зөөлөн тоглоомтой болно лээ. 

Дараагийн дуу нь Баруун Германы "Dschinghis Khan" хамтлагийн алдарт “Genghis Khan”. Бээжин-2022 өвлийн Олимпын аварга, Дэлхийн аварга, 2022 оны ОХУ-ын аварга Марк Кондратюк “Чингис хаан” дууг Драмын дөрвөлийн дуулсан хувилбар дээр уран гулгалтын тусгай үзүүлбэрээ бэлтгэсэн байв.

Цэнхэр торгон монгол цамцтай, толгойдоо дөрвөн талт малгай тавьсан Марк нум сум агсаж, харваж байгаагаар үзүүлбэрээ эхлэн үзэгчдийг хөтөлж, цааш үргэлжлэх эрч хүчтэй хэмнэлд тохирсон хурдтай агаад уран гулгалтын гурвалсан сальхов, тулуп, аксель үсрэлтээ гүйцэтгэж, дэлхийн түвшний уран гулгагч гэдгээ нотлов. 

За тэгээд, мөсний хатан хаан гэж алдаршсан 2015 оны дэлхийн аварга, 2021 оны ДАШТ-ий мөнгөн медальт, Европын аварга, 2021 онд Шведэд болсон дэлхийн залуучуудын уран  гулгалтын тэмцээний аварга, 13-тайгаасаа олон улсын тэмцээнд орж эхэлсэн Елизабета Туктамышева ирсэн.



Дөрвөн наснаасаа уран гулгалтаар хичээллэсэн 26 настай тэрбээр 15, 16 настай шинэ үеийнхэнтэй мөр зэрэгцэн гулгаж, мөсөн талбайгаа эзэгнэсээр байна. Туктамышева Елена Ваенга “Снег” буюу Цас дуун дээр үзүүлбэрээ үзүүлсэн.  



Дэлхийн шилдэг хос гулгагчдын үзүүлбэр бас л гайхшируулсан. Бээжин-2022 олимпын багийн төрлийн аварга, 2022 оны дэлхийн аварга, Европын хошой аварга Виктория Синицина, Никита Кацалапов нар бүжгийн дэлхийн шилдэг хос. 

Энэ цагийн дэлхийн шилдэг спортын төрлийн хос гулгагч, Бээжингийн олимпын мөнгөн медальт, дэлхийн аварга Евгения Тарасова, Владимир Морозов, ОХУ-ын 2023 аварга, 2022 оны Европын аварга, Александра Бойкова, Дмитрий Козловский нар уран гулгалт хэмээх мөсөн дээрх урлаг нь жүжиг, бүжиг, гоо сайхан, ур чадварын төгс илэрхийлэл болж байна. 



Эцэст нь  уран гулгалтын спортын энэ цагийн дэлхийн хамгийн шилдэг уран гулгагч Камила Валиева. Уран гулгалтын шоу тоглолт хоёр хэсэгтэй болсон бөгөөд хоёр хэсгийг алдарт Камила Валиевагийн үзүүлбэрээр хаав. Монголчуудын хүсэн хүлээсэн мөч ирлээ. Камила Валиева эхний хэсэгт Бээжингийн олимпын мөсөн талбайд гайхуулж, нэрийн хуудас болсон Кирилл Рихтерийн домогт “In memoriam”-аа, хоёр дахь хэсэгт Бээжингийн олимпын дуулианаас хойш гаргасан шинэ үзүүлбэр “Wednesday” цувралаараа Монголын ард түмэнтэй мэндчиллээ. 

Бээжингийн олимпын алтан медалиа авч чадаагүй ч олимпын аварга хэмээн дэлхийд хүлээн зөвшөөрөгдсөн алдарт Камилла Валиева-гийн өмнөх бүтээлүүдээс “Wednesday” тэс өөр. Хар даашинзтай, хурц шийдэмгий хөдөлгөөнтэй эрч хүч мэдрэгдэх энэ бүтээл нь хүчирхэг, бэрхшээл давах нугаршгүй дайчин Камила-г дэлхийд дахинд танилцуулж, шуугиан тарьсан. “Wednesday” цувралаар тэр өөрийнхөө эсэргүүцлийг зарласан гэж дэлхийн хэвлэлүүд бичиж байжээ. 

“Уран гулгалтын одод Монголд” шоуны хоёр дахь өдөр Камила Валиевагийн гулгаж байх үед техникийн саатал гарч хөгжим тасрав. Хөгжимгүй хэдий ч үзэгчдийн халуун алга ташилтын дор Бээжингийн олимпын мөсөн талбайд гайхуулж, “In memoriam”-аа ягаан даашинзтай охин өө сэвгүй гүйцэтгэв. Тооцоолоогүй гэнэтийн саатал байсан ч үзэгчид болон уран гулгагчийн хооронд амьд харилцаа үүссэн мэт халуун дулаан орчин бүрдэх агаад хөгжим тасарлаа гээд үзэгчийн сэтгэл гонсойгоогүй нь танхим дүүрэн үзэгчдийн алга ташилтын түрлэгээс мэдрэгдэх аж. 



20 минут завсарласны дараа шоуны хоёрдугаар хэсэг эхлэв. Тоглолтын эхэнд Камила Валиева үзэгчдээ хүндэтгэж, өөрийн хүсэлтээр хөгжим тасарсан хэсгээс эхлэн үзүүлбэрээ дахин үзүүлж, үзэгчдэд бэлэг барилаа. 

Монгол Улсын Засгийн газар, Биеийн тамир спортын улсын хороо болон ОХУ-ын Спортын яам, Уран гулгалтын холбооны хамтын ажиллагааны үр дүнд энэхүү тоглолт хоёр жилийн турш яригдаж, бэлтгэл хангасны эцэст ийн биеллээ оллоо. 

Монгол Улс олон улсын стандарт шаардлагад нийцсэн мөсөн талбайтай болсон учир дэлхийн түвшний уран гулгагчид манай оронд хүрэлцэн ирснээ хэвлэлийн хурлын үеэр хэлж байв. Мөн Монголд уран гулгалтын спортыг хөгжүүлэх чиглэлээр хамтарч ажиллах, багш бэлтгэх зэрэгт дэмжлэг үзүүлж, хамтран ажиллахаа ОХУ-ын уран гулгалтын холбооны удирдлагууд мэдэгдсэн билээ.