Хүүхэд байхдаа шүдний эмнэлэгт очно гэхээс үнэхээр их айдаг байв. Цагаан халадтай эмч, сувилагч нар, тэдний хэрэглэж буй багаж хэрэгслийг харахаар л өөрийн эрхгүй өвдөг чичирнэ.

Харин орчин цагт хүүхдийн шүдний эмнэлэг хүүхдүүдийн очих дуртай газар болсон байна. Хүүхдүүдэд зориулсан тохижилттой, бүр хүүхдүүдэд зориулсан тусгай ломботой. “Эмч нь шүдэн дээр нь дагина зураад өгье” хэмээн инээмсэглэхэд дургүйцэн уйлах хүүхэд ховор болжээ. Гэхдээ мэдээж энэ нь хувийн эмнэлгүүд.

Эхлэл гэдэг ажлын хагас нь гэдэгчлэн хувийн эмнэлгүүд ийнхүү олон улсын стандартыг хангаад ирэхээр бусад газрууд ч даган өөрчлөгдөх биз ээ. GoGo мэдээний агентлагаас орчин цагийн үйлчилгээнүүд хэрхэн хөгжин дэвшиж буйг та бүхэндээ фото цувралаар хүргэхээр боллоо. 

ХҮЛЭЭЛГИЙН ТАНХИМААСАА Л ХҮҮХДИЙГ "ЭРХЛҮҮЛНЭ"

Бид орчин цагийн шүдний эмнэлгүүд хэрхэн өөрчлөгдөж байгааг та бүхэнд харуулахаар дөрвөн эмнэлгийг сонгосон юм. 

Энэ бол эдгээр эмнэлгүүдийн хүлээлгийн танхим. Хүүхдүүд ээлжээ хүлээн айж чичрэн суух биш тоглоом тоглож, эрхэлж наадан сууна. Хүсвэл зурагтаар хүүхэлдэйн кино ч үзнэ. Бяцхан хүүхэд бүрт углааш өмсгөнө. Цаг нь хүртэл хүүхдийнх.

ЭМНЭЛГИЙН ДОТООД ОРЧИН

Эмнэлгийн дотоод орчин бүхэлдээ хүүхдүүдэд зориулагдсан, тэдний анхаарлыг татах, айдсыг үгүй хийх зорилготойгоор тохижуулагджээ. Энд ирсэн хүүхдүүд эмнэлэгт ирсэн гэхээсээ илүүтэй тоглоомын төвд зочилсон мэт таатай мэдрэмж төрүүлэх аж. 

БАГАЖ ТЕХНИКЭЭС Ч АЙХ ШААРДЛАГАГҮЙ БОЛЖЭЭ

Шүдний эмчийн өрөө, багаж төхөөрөмж гэдэг аймшигтай зүйл биш болжээ. Шүдээ эмчлүүлж байхдаа хүртэл таазанд суурилуулсан зурагтаар хүүхэлдэй үзнэ. Орчин үеийн хүүхдүүд үнэхээр азтай юмаа гэх бодол эрхгүй төрнө.

Ийнхүү дөрвөн эмнэлгээр хийсэн аялал маань өндөрлөж байна. Бид дараагийн удаад орчин цагийн оффисууд хэрхэн өөрчлөгдөж, ажилчдынхаа орчинг шинэлэг байдлаар яаж тохижуулсныг сонирхуулах болно.

“Удвалдент” хүүхдийн шүдний эмнэлэг
БГД, 4-р хороо, 25-р эмийн сангийн автобусны буудал дээр Луна плаза 2-р давхар
Утас: 98188030, 99131931

“Сүүн шүдхэн” хүүхдийн шүдний эмнэлэг
Сүхбаатар дүүрэг, 5-р хороо, ТЗ-ийн 52-Р байр 1 тоот /Өгөөж чихэр боов үйлдвэрийн замын урд/
Утас: 77036500, 88036500, 99036500

“Энхийг цацруулагч” гэр бүлийн эмнэлэг
БЗД, 15-р хороо, 13-р хороолол халдвартын эцсийн буудал дахь "НТ" төвийн 2-р давхарт
Утас: 76064303, 88084303

“Майдент” гэр бүлийн эмнэлэг
БЗД, 18-р хороо, 13-р хороолол, 38-р байр
Утас: 11480590, 99816770