Азийн 17 дахь удаагийн наадам 2014 БНС-ын Инчён хотноо болж яг одоо хаалтын ажиллагаагаа хийж байна. Хаалтын ажиллагааг цэнгэлдэхэд нь 60 мянга шахам хүн үзэж байгаа бол 9000 гаруй тамирчин цэнгэлдэхэд жагсан орж ирлээ.

"Тивийн олимп” хэмээгдэн дөрвөн жилд нэг удаа болдог нэр хүндтэй энэхүү наадамд нийт 45 улс орны 13 мянган тамирчин түүний дотор манай улсаас спортын 23 төрөлд 250 тамирчин хурд хүч, авхаалж самбаагаа сорьлоо.

Азийн наадмын хугацаанд манай тамирчид 5 алт, 4 мөнгө, 12 хүрэл медалийн эзэд болон медалийн чанараараа 45 улс орноос 16-д жагслаа. Хамгийн их хүн амтай энэ тивийн хамгийн цөөн хүн амтай улс орны нэг болох Монгол Улсын маань тамирчдын үзүүлсэн амжилт чамлалтгүйгээр барахгүй бахархмаар.

Есдүгээр сарын 19-өөс аравдугаар сарын 4-нийг хүртэл үргэлжилсэн Азийн наадмын мэдээ мэдээллийг АЗИЙН НААДАМ 2014 цэснээ багцлан бид та бүхэнд хүргэлээ. Мөн наадмыг газар дээрээс нь сурвалжлуулахаар Үндэсний портал GoGo.mn сайт өөрийн сэтгүүлч У.Бадамцэцэгийг томилсон билээ. Ингээд дээрх хугацаанд АЗИЙН НААДАМ 2014 цэсэнд нийт 200 шахам мэдээ мэдээлэл, ярилцлага хүргэжээ. Үүний зэрэгцээ медаль авсан тамирчдынхаа хөлс нь хатаагүй үеийн анхны сэтгэгдлүүдийг буулгасан видео болон тухайн агшны фото зургуудыг Үндэсний портал GoGo.mn сайт та бүхэнд шуурхай хүргэж ажиллалаа.

Ийнхүү ажиллахад ИВЭЭН ТЭТГЭГЧЭЭР Наран группийн Азийн наадмын албан ёсны цаг тоологч TISSOT брэнд:

“Таван богд” ХХК ажиллалаа. Монголынхоо спортын мэдээллийг манай сайтын хэрэглэгчдэд шуурхай хүргэхэд гүн туслалцаа үзүүлсэн та бүхэнд талархлаа илэрхийлье.

“Инчён-2014” пара спортын тамирчдын Ази тивийн XI наадам 14 хоногийн дараа эхэлнэ. Энэхүү наадамд манай улсаас спортын есөн төрлөөр 66 тамирчин, 22 дасгалжуулагч, хэвлэл мэдээлэл, штабын ажилтан нийт 118 хүний бүрэлдэхүүнтэй явахаар бэлтгэжээ.

Азийн наадмын хаалтын ажиллагаа өнөөдөр болох гэж байна.

Азийн наадамд оролцсон 45 орны тамирчид нэгэн дээвэр дор цуглалаа. 17 дахь Азийн наадамд зориулсан урлагийн тоглолт яг одоо эхэлж байна.
 

Азийн наадмын найруулагчдаар Им Квон Тэйк, Жан Жин нар ажилласан юм. Тэд Хаалтын ажиллагааг Азийн наадмын алтан үеийг дурсах, тамирчид гэртээ эргэн харьсан ч тэрхүү гайхалтай мөч хормууд үүрд дурсагдах зорилгоор найруулсан хэмээсэн. Хаалтын ажиллагаа үндсэн гурван хэсэгтэй байх бөгөөд эхнийх нь тамирчдыг цэнгэлдэхэд урин оруулах, хоёр дахь нь Азийн наадмын онцлох мөчүүдийг эргэн дурсах, төгсгөлд нь баяр хүргэн мэндчилэх аж.

Солонгосын алдартай хамтлаг болох CNBLUE хамтлаг дөнгөж сая “I’m Sorry” and “Can’t Stop” дуунуудаа хүргэлээ.

Азийн наадам 2014-ийн зохион байгуулах хорооны ерөнхийлөгч Ким Ён Сү дөнгөж сая үг хэллээ.

Тэрээр “Бид хамтдаа байж чадвал илүү их зүйлийг бүтээн байгуулж чадах юм гэдгийг энэ удаагийн Азийн наадам спортын уралдаан тэмцээнээр дамжуулан хүргэж чадлаа. 16 хоног маш хурдан өнгөрлөө. Маш их сэтгэл хөдөлгөсөн, хүн бүхэнд мартагдашгүй сайхан дурсамжийг үлдээсэн та бүхэнд баярлалаа. Азийн наадмын үйл ажиллагааг зохион байгуулагчид болон энэ олимпийг шууд дамжуулан хүргэсэн хэвлэл мэдээллийн байгууллагуудад баярлалаа. Бид 4,5 тэрбум хүнтэй нэгэн бүл билээ. Бид асуудалд уужуу тайван хандаж, энхтайван, найрамдлыг эрхэмлэх нь зүйтэй гэдгийг бид энэхүү наадмаараа дамжуулан хүргэхийг зорьлоо” хэмээсэн юм.

Түүнийг үг хэлсний дараа Азийн олимпийн хорооны тугийг буулгалаа. Мөн Индонезийн Жакарта хотноо 2018 оны Азийн наадам зохиогдоно гэдгийг Азийн олимпийн хорооны ерөнхийлөгч зарлалаа.

Уламжлал ёсоор Азийн наадмыг зохион байгуулах дараагийн улс орны төрийн дуулал эгшиглэлээ. Ийнхүү Индонезийн төрийн дууллыг эгшиглүүлсний дараа Азийн наадмын бамбарыг Индонези улсад шилжүүлэн өглөө.

"Азийн наадам 2014" шууд сурвалжлагын ивээн тэтгэгч:
"НАРАН" групп

"ТАВАН БОГД" ХХК