Төр, засгийн өндөр хариуцлагатай алба хашиж буй  эмэгтэйчүүд Та бүхэнд болон Та бүхнээр уламжлан Монголын нийт эхчүүд, эмэгтэйчүүддээ Олон улсын эмэгтэйчүүдийн эрхийн өдрийг тохиолдуулан баярын мэндчилгээ дэвшүүлье.

Улс орны хөгжил дэвшлийн төлөө эмэгтэйчүүд, эхчүүдийн хийж гүйцэтгэсэн ажил үйлс, оруулсан хувь нэмрийг төр, засаг зүй ёсоор ямагт өндрөөр үнэлдэг юм. Манай эмэгтэйчүүд Монгол Улсын улс төр, эдийн засаг, нийгмийн амьдралын  бүхий л хүрээнд ихээхэн хүчин чармайлт гарган хөдөлмөрлөж  байгааг тэмдэглэхэд таатай байна.

Улс орны тэн хагасаас илүү хувийг эзэлдэг эмэгтэйчүүдийн төлөөлөл, оролцоог  төр, засаг, иргэний нийгмийн түвшинд улам нэмэгдүүлэх, тэднийг улс төрийн бодлого боловсруулах, шийдвэр гаргах түвшинд төлөвшүүлэх, хүйсийн тэгш байдлыг хангахад төр, засгаас ихээхэн анхаарч, эрх зүйн болон бодлогын шинэчлэлийн хүрээнд эмэгтэйчүүдийн асуудлыг онцгойлон авч үзсээр ирсэн.

Хүний эрх, хүйсийн тэгш байдлын талаархи тулгамдсан асуудлуудыг тал бүрээс нь хэлэлцэж, үнэтэй санал зөвлөмж гаргасан “Хууль тогтоох дээд байгууллагад эмэгтэйчүүдийн оролцоо” сэдэвт чуулга уулзалтад би өчигдөр оролцож, парламентаас батлан гаргаж буй хууль, бусад шийдвэрт саналаа тусган хэрэгжүүлэхэд Та бүхний санал санаачилга чухал болохыг онцлон тэмдэглэж хэлсэн билээ.

Тэгш эрх, адил боломжийг бүрдүүлэх талаар баримталж буй  төрийн бодлогын биелэлтийг хангах, тэдгээрийн эрх зүйн үндсийг боловсронгуй болгоход төр, засгийн өндөр хариуцлагатай алба хашиж буй Та бүхэн зохих хувь нэмэр оруулна гэдэгт итгэж байна.

Та бүхэнд амжилт хүсч, эрүүл энх , сайн сайхан бүхнийг хүсэн ерөөе.