Ерөнхийлөгч У.Хүрэлсүх “Инновацын эзэд” уралдаант нэвтрүүлгийн шилдэг оролцогчдыг өчигдөр хүлээн авч уулзлаа.

Энэ нэвтрүүлгийг монгол залуусын зохион бүтээх сэтгэлгээг хөхиүлэн дэмжиж, шинийг санаачлан, хийж бүтээх хүсэл эрмэлзлийг өдөөж, шинэ санаа хэрхэн инновацын бүтээгдэхүүн болдог тухай мэдлэг, мэдээллийг сурталчлан таниулах зорилгоор Ерөнхийлөгчийн ивээл дор Боловсрол, шинжлэх ухааны яам, ‘NTV’ телевизтэй хамтран зохион байгуулсан юм.

Уулзалтын эхэнд Ерөнхийлөгч “Инновацын эзэд” нэвтрүүлэгт мэдлэг, чадвараа сорьсон бүх оролцогчдод талархал илэрхийллээ.

Монгол Улсын ирээдүй болсон хүүхэд, залуус ундардаг баялаг болох оюун ухаанаараа өрсөлдөж, мэдлэгт суурилсан нийгмийг бүтээх учиртайг онцлон тэмдэглэв.

Мод тарьж ургуулж, тордохыг дэмжсэн, байгаль орчноо цэвэрлэнгээ баялаг бүтээсэн, хөгжлийн бэрхшээлтэй иргэдийн асуудлыг шийдсэн, хүнд ээлтэй, хүрээлэнд буй орчинд ээлтэй шинэ санал, санаачилгуудаар нэвтрүүлэгт оролцсон шилдэг оролцогчдод баяр хүргэж, цаашдын ажилд нь амжилт хүсэв.

“Инновацын эзэд” нэвтрүүлэгт хүрээлэн буй орчин, хөдөө аж ахуй, үйлдвэрлэл, хүний өдөр тутмын амьдралын асуудлыг шийдвэрлэж, үйл ажиллагааг хөнгөвчилсөн техникийн шийдэл, инновацлаг бүтээлээр 12-25 насны оролцогчид өрсөлдсөнөөс шилдэг найман баг сүүлийн шатанд шалгарсан. Б.Гүнхичээнгүй ахлагчтай “Тэрбум мод” баг Модны нүх ухагч робот, суулгац ухагч төхөөрөмж бүтээлээр Нэгдүгээр байрт, М.Эрдэнэбаяр ахлагчтай “GNB” баг “Хуванцар хавтан” бүтээлээр Хоёрдугаар байрт, Б.Тэмүүл Гарын хүч нэмэгдүүлэх төхөөрөмж бүтээлээр Гуравдугаар байрт тус тус шалгарч, мөнгөн шагналын эзэн болсон юм.