Монгол орны хэмжээнд гадаргын болон газрын доорх усны нөөцийн бүртгэл хөтлөх, усны нөөцийг зохистой ашиглах, хамгаалах, нөхөн сэргээх, ус хуримтлуулах талаар нэгдсэн мэдээлэл бүрдүүлэх зорилгоор усны тоо бүртгэлийн ажил өнгөрөгч зургадугаар сараас явагдаж эхэлсэн билээ.

Харин энэхүү тооллогын ажил долдугаар сарын 20-ны өдөр дуусч усны тоо бүртгэлийн дүнг нэгтгэх ажил Усны газарт үргэлжилсэн.

Тэгвэл улсын усны тоо бүртгэлийн урьдчилсан дүн саяхан гарсан байна.

Тус тайланд 2011 оны байдлаар манай улсад 6646 гол, 3613 нуур, 10557 булаг, 265 рашаан бүртгэгджээ.

Харамсалтай нь дээрх тооны нийлбэр болох нийт 21081 гол, нууруудаас 2621 нь ширгэсэн гэх тооцоо гарсан байна.

Өөрөөр хэлбэл нийт 551 гол, 483 нуур, 1587 булаг усгүйдэж ширгэсэн аж.

Дашрамд дурьдахад, улсын хэмжээнд нийт 66 цэвэрлэх байгууламж, 14 усан цахилгаан станц үйл ажиллагаагаа явуулдаг юм байна.