УИХ-ын гишүүн Б.Батцэцэг цаг үеийн асуудлаар мэдээлэл өглөө.

Тэрээр "Намын бага хурлын үеэр би НҮБ-ын 80 жилийн ойн Ерөнхий Ассамблейн хуралд оролцоод байгаагүй. Өнөөдрийн үүссэн нөхцөл байдалд Засгийн газрын гишүүний хувьд их харамсаж байна. Уг нь шийдэл нь их амархан.

УИХ-ын дарга Д.Амарбаясгаланг би 20 гаруй настай, залуухан байхаас нь л мэднэ. УИХ-ын дарга гэдэг хамгийн өндөр албан тушаал. Монголын бүх дарга нарыг удирдаж байгаагийн хувьд их хариуцлагатай, үг, үйлдлээрээ үлгэрлэх ёстой гэж боддог. Бид ч залуу хүнийх нь хувьд дэмжиж, УИХ-ын даргаар томилж ажиллуулсан. 

Гэтэл өнөөдрийн нөхцөл байдалд нүүрсний хулгай, авлига, албан тушаалын хэрэгт холбогдож байгаагийн хувьд ажлаа хүлээлгэн өгч, хуулийн байгууллагад шалгуулсны дараагаар улс төрийн карьераа үргэлжлүүлэх ёстой гэж үзэж байна" гэв.