Guys хамтлагийн дуучин Х.Бат-Ундрал хар тамхины эсрэг дуудлага буюу challenge эхлүүлж байгаагаа хэвлэлийн бага хурал хийн мэдэгдлээ. Түүний уриалга өнөөдрөөс эхлэн, энэ сарын 26-ныг хүртэл үргэлжилнэ.

Тэрбээр энэхүү challenge-дээ GUYS  хамтлагийн гурван гишүүнээ дуудаад байгаа юу хийж уриалахыг өөрийн фэйсбүүк хуудсаар дамжуулан мэдээлэх болно гэв.

Х.Бат-Ундрал:

"Би залуучууддаа үлгэр дууриал болохын оронд ийм муухай зүйлтэй орооцолдож, дотны хүмүүсийнхээ урмыг хугалж, итгэлийг нь алдсандаа ээжээсээ, ах эгч дүү нараасаа, мөн манай хамтлагийг сонсдог олон мянган хүүхэд залуучуудаасаа уучлалт гуйж байна.

Намайг уучлаарай, Уугий нь дахиж хэзээ ч алдахгүй ээ. Харин ч энэ хар тамхи мансууруулах бодисны эсрэг өөрийн дуу хоолойгоо, үзэл бодлоо хүүхэд залуучууддаа хүргэж байх болно" хэмээн уучлалт гуйсан юм.

Тэрбээр өнгөрсөн жил хар тамхины хэргээр шалгагдаж эхэлсэн бөгөөд 2016 оны тавдугаар сарын 24-ний өдөр Улсын Мөрдөн Байцаах газарт саатуулагдаж, хар тамхины хэргийн сэжигтнээр шалгагдаж эхэлжээ. Х.Бат-Ундрал 2016 оны аравдугаар сарын 9-нд  Хан-Уул дүүргийн шүүхээс борлуулах зорилгогүйгээр хар тамхи хадгалсан хэргээр хоёр жилийн ял авсан байна. Тэрбээр "Гэвч энэрэнгүй зарчмаар намайг хар тамхитай тэмцэж, олон нийтэд хар тамхийг буруу зүйл гэдгийг ухааруулж ойлгуулах ажил хийгээрэй гэж итгэл хүлээлгэн хоёр жилийн ялаа хоёр жилийн тэнсэн харгалзах ял болгосон. Одоогоор ялаа эдэлж байна" гэсэн юм.

Одоогоор түүний дуудлагад Монголын залуучуудын холбоо, Оюутны холбоо, Сурагчдын холбоо, Скаутын холбоо нэгдээд байна.

Манай улсад хар тамхитай холбоотой гэмт хэргийн гаралт ихээхэн ихэссэн. Хар тамхийг дамжуулагч, тээвэрлэгч гэсэн статустай байсан Монгол Улс хэрэглэгч орон гэсэн бүртгэлтэй болжээ. ОХУ, БНХАУ болон Зүүн Өмнөд Азийн орнууд гэсэн гурван чиглэлээр манай улс руу дээрх хууль бус барааг нэвтрүүлдэг аж.    

Урд хөршөөс афетамин, метафетамины төрлийн мөс, мансууруулах ургамлын гаралтай шавах зэрэг бодисыг хууль бусаар нэвтрүүлдэг бол хойд хөршөөс сэтгэцэд нөлөөлөх андате зэрэг эмийг нийлүүлдэг аж.

Манай улсын хар тамхи, мансууруулах эм, бэлдмэлтэй холбоотой гэмт хэргийн улмаас 57 эрэгтэй, есөн эмэгтэй хүн ял шийтгүүлжээ. Мөн дахин 22 хүнийг сэжигтнээр татан шалгаж байгаа аж. Сүүлийн  гурван жилд энэ төрлийн гэмт хэрэг үйлдсэн хэрэгтнүүдийн нас залуужин, 18 нас хүрээгүй хүүхдүүд хэрэгт холбогдох болжээ.        

Зургаадугаар сарын 26-ны өдрийг дэлхий нийтээрэээ хар тамхны эсрэг өдөр болгон тэмдэглэдэг юм байна.