Үйлдвэр үйлчилгээний байгууллагын үйл ажиллагаа болон иргэдийн хөдөлгөөнийг үе шаттай эхлүүлнэ. Тиймээс одоо мөрдөж байгаа хот хоорондын хөдөлгөөний журмыг энэ сарын 24-нийг хүртэл хэвээр үргэлжлүүлнэ хэмээн УОК-ын дарга, Шадар сайд Я.Содбаатар мэдээллээ. 

Тэрээр "Эрүүл мэндийн яамны зөвлөмжийг үндэслэн арванхоёрдугаар сарын 24-нийг хүртэлх хот хоорондын хөдөлгөөнд одоогийн дүрэм журмаа мөрдөхөөр тогтсон. Өөрөөр хэлбэл, дуртай нэг нь УБ руу орж, гарахгүй. Өмнөх шигээ халдварын голомтгүй газраас ирэгсэд асуумжаа бөглөнө. Голомттой бүс нутгаас ирж байгаа нь түргэвчилсэн болон ПСР шинжилгээгээ өгч байж 24-нийг хүртэл орж, гарна.

Одоогийн байдлаар 118.171 иргэн бүртгүүлсний 109.705 нь буюу 91,8 хувь нь шинжилгээ өгсөн. Тэдгээрээс сүүлийн 2 өдөр хариугаа аваагүй эсвэл шинжилгээ нь гарсан ч хотоос гараагүй иргэдийг 18-ны 06:00 цаг хүртэл гаргана. Түүнээс хойш шинжилгээний хариу хүчин төгөлдөр бус болох учир гарах бол шинжилгээг дахин өгнө. Одоогоор шинжилгээ өгсөн хүмүүсийн 47,8 хувь нь гараад байгаа юм" гэлээ.