Үндэсний Дээд лигийн плей-оффын эхний шатанд учраа таарсан М Гарьд болон Завхан Бродерс багуудын цувралын зургаа дахь тоглолт боллоо.

Лигийн үндсэн улиралд долоодугаар байр эзэлж лигийн дэд багтай тоглосон Бродерс нэмэлт цагт 97-94 харьцаагаар хожсоноор цувралын харьцаа 4-2 болж Бродерс дараагийн шатанд шалгарлаа.

М Гарьд баг тоглолтын эхнээс тэргүүлж 10 онооны илүүгээр хошуучилж байсан ч шийдвэрлэх дөрөвдүгээр үед дараалан олон оноо алдаж тэнцсэн.

Гарьдуудаас багийн гол оноо авагч Клийнтони Өрли дөрөвдүгээр үеийн төгсгөлд зохисгүй үйлдлээсээ болж талбайгаас хөөгдсөн бол нөгөө талаас төвийн тоглогч Отгонжаргал болон Мөнхтүвшин нарын хувийн алдаа таваас дээш гарч талбайг чөлөөлөв. Улмаар нэмэлт цагт сэтгэл зүйн давуу талтай Завхан Бродерс сайн хамгаалж тоглолт дууссан.

Завхан Бродерсыг хагас шигшээд Тэнүүн Өлзий Металл баг хүлээж байна. Металлууд Архангай Алтан Дорнодын Дайчид багийг 4-1 харьцаагаар илүүрхсэн билээ.