Тэргүүлэх эдийн засагтай улс орнууд газрын тосны стратегийн нөөцөө ашиглана гэдгээ мэдэгдээд байна.

Тухайлбал: АНУ 50 сая баррель газрын тосыг стратегийн нөөцөөсөө ашиглана гэж мэдэгдлээ. АНУ газрын тосны үнийг баррель нь 80 ам.доллароос бууруулахаар зориод байгаа юм. Үүний дараа брент төрлийн газрын тосны үнэ 2.8 хувиар өссөн үзүүлэлттэй байна.

Мөн БНХАУ, Япон, БНСУ, Их Британи тэргүүтэй газрын тосны томоохон хэрэглэгч улс нэгдэж байна. Одоогоор БНЭУ таван сая, Их Британи 1.5 сая, БНХАУ 7.3 сая баррель газрын тосыг стратегийн нөөцөөсөө ашиглана гэдгээ мэдэгдээд байгаа юм.

Ирэх долоо хоногт болох уулзалтаар OPEC-ийн Өргөтгөсөн бүлэг газрын тосны гарцаа нэмэгдүүлэх төлөвлөгөөгөө хойшлуулах эсэхээ шийдвэрлэхээр байна. Улс орнуудад эрчим хүчний хямрал нүүрлэж, инфляц эрчимжихтэй зэрэгцээд газрын тосны үнэ энэ онд олон жилийн дээд цэгт хүрч өсөөд байсан юм. Ийнхүү тэргүүлэх эдийн засагтай улсууд газрын тосны үнийг бууруулах зорилгоор ийм арга хэмжээ авч эхлээд байна.

Брент төрлийн газрын тосны үнэ 3.27 хувиар өсөж, 82.3 ам.доллар болоод байна. Харин WTI төрлийн газрын тосны үнэ 0.5 хувиар буурч, 78.1 ам.доллар байна.