Өмнөговь аймгийн Ханбогд сумын Хайрхан багийн Цагаан хад суурьшлын бүсэд зургадугаар сарын 29-ны өдрөөс хойш өнөөдрийг хүртэл "ковид-19" халдвар гараагүй. Эрүүл мэндийн сайдын 456-р тушаалд батлагдсан тохиолдлоос хойш 28 хоног өвчлөл бүртгэгдээгүй бол халдвар зогслоо гэж үзнэ гэжээ.

Иймд Гашуун сухайт, Цагаан хад суурьшлын бүс халдваргүй бүс болжээ гэж тус аймгийн Онцгой комиссоос мэдээлэв.

Өмнөговь аймгийн Засаг дарга Р.Сэддорж дараах мэдээллийг өгөв:
-Гашуунсухайт манай улсын төсвийн орлогыг бүрдүүлдэг гол боомт. Энэ боомтод үүссэн нөхцөл байдлыг зохицуулахаар Засгийн газраас томилсон бүрэн эрхт төлөөлөгч Алтангэрэлийн томилсон багтай бид хамтран ажиллалаа. Гашуунсухайт боомтын хамгаалалтыг нэмэн, орох гарах хөдөлгөөнийг бүрэн хорьсон. Ингэснээр ногоон бүс болгож чадлаа. Сүүлийн өдрүүдэд бидний хийсэн шинжилгээгээр жолооч нарын хариу бүгд сөрөг гарсан. Өнөөдрийн байдлаар 193 жолооч, маргааш 100 гаруй жолооч урд хил рүү гарна. Зэсийн баяжмал тээвэрлэсэн 80 гаруй машин тогтмол явж байна.

Бид шаардлагатай бүх зардлыг гарган, хүн хүчээ дайчлан ажиллаж байна. Цаашдаа өдөрт 1000 машиныг урд хилээр нэвтрүүлснээр Цагаан хаданд буулгасан нүүрс буурна. Цаг агаарын улмаас нүүрс шатах аюултай тул БНХАУ-ын Баяннуур аймагтай нягт хамтран ажиллаж байна.

Бусад газраас ирж буй жолооч нарыг Цогтцэций суманд 14 хоног тусгаарлаж байна.