МУИС-ийн Номын сан “Анхны цахимжсан номын сан” танилцуулах арга хэмжээг энэ сарын 20-нд зохион байгуулах гэж байна. Тодруулбал МУИС-ийн Номын сангаас хамгийн их уншлагад гардаг монгол хэлээрх ном бүтээлийн цахим санг үүсгэн байгуулсан төслийг хэрэгжүүлсэн юм. 

МУИС-ийн Номын сан Цахим сан хөмрөгөө нэмэгдүүлэх ажлын хүрээнд нэгж, салбар номын сангуудын ном олголтын тоонд үндэслэн хамгийн их үйлчилгээний үзүүлэлттэй МУИС-ХЗС-ийн номын санг сонгож тухайн номын сангийн сан хөмрөгт хадгалагдаж буй монгол хэлээр хэвлэгдсэн ном нэг бүрд зохиогчийн эрхийн судалгаа хийсэн.

Зохиогчийн эрхийн судалгаанд үндэслэн зохиогч, зохиогчийн эрх эзэмшигч зөвшөөрсөн бүтээл тус бүр дээр гэрээ хийх, хэвлэмэл бүтээлийг сканердах, цахим хэлбэрт хөрвүүлэх, системд байршуулах, уншлага үйлчилгээнд гаргах гэх мэт олон шат дараалалтай ажлуудыг хийжээ.

1. Зохиогч, зохиогчийн эрх эзэмшигч зөвшөөрсөн 400 орчим нэр төрлийн 200 сая орчим төгрөгийн үнэ бүхий номыг зохиогчтой гэрээ хийн, худалдан авч “ЦАХИМ САН”-гаа баяжуулав.
2. Зохиогч, зохиогчийн эрх эзэмшигч зөвшөөрсөн болон Зохиогчийн эрхийн тухай хуулийн хүрээнд нийтийн хүртээл болсон 767 нэр төрлийн ном хэвлэлийн бүтээгдэхүүнийг бэлэг хандивын шугамаар бүрдүүлэн үнэ төлбөргүйгээр “ЦАХИМ САН”-даа байршууллаа.
3. Уг төсөл хэрэгжсэнээр МУИС-ийн Номын сангийн “ЦАХИМ САН” хөмрөгийг нийт 1200 орчим нэр төрлийн номоор нэмэгдүүлж, баяжуулсан.
4. Энэ нүсэр ажлыг МУИС-ийн Номын сангийн хамт олон өөрийн дотоод нөөц боломжоо ашиглан хийж хэрэгжүүлсэн.
5. Номын сангийн сан хөмрөгийг түшиглэсэн анхны томоохон зохиогчийн эрхийн зөрчилгүй “ЦАХИМ САН”-тай болох ажлын суурийг тавив.