Курдын ажилчны намын босогчид Туркийн зүүн өмнөд нутагт явсан цэргийн хоёр хуягт машиныг дэлбэлж, Туркийн армийн 16 цэргийн аминд хүрч, зургаан хүнийг шархадуулсан хэрэг энэ сарын 6-нд гарсан.

Уг халдлагын дараа Туркийн арми Иракийн хойд нутаг дахь босогчдын байрлалд цохилт өгч, цэргийн ажиллагаа явуулсан байна.

Агаарын цохилтод сөнөөгч онгоц F-16 болон F-4 ашигласан бөгөөд босогчдын 20 гаруй байрлалыг устгажээ.

Сануулахад өнгөрсөн долоо, наймдугаар саруудад Туркийн аюулгүй байдалд заналхийлсэн цуврал халдлагууд болсонтой холбогдуулан долдугаар сарын 24-нөөс эхлэн Туркийн арми "Исламын улс” бүлэглэлийн босогчдын болон Курдын ажилчны намын салан тусгаарлагчдын цэргийн баазад агаараас цохилт өгч эхэлсэн юм.

Эх сурвалж: Anadoly Agency