-Нийгмийн даатгалын шимтгэлийг 18 сар төлсөн, ажлаа хийж байгаад хүүхдээ дутуу төрүүлсэн эхэд жирэмсний ба амаржсаны тэтгэмж авах эрх үүсэх үү? Эрх үүсдэг бол тэтгэмжийг хэдэн хувиар боддог вэ? /Чингэлтэй дүүргийн иргэн Ч.Болормаа/

-Нийгмийн даатгалын шимтгэлийг жирэмсний чөлөө авахаас өмнө 12 сараас доошгүй хугацаанд, үүнээс сүүлийн зургаан сард нь шимтгэлийг тасралтгүй төлсөн даатгуулагч эх жирэмсний болон амаржсаны тэтгэмж авах эрхтэй. Шимтгэл төлөх хугацааг хангасан, хүүхдээ 196 хоног тээсэн даатгуулагч эх тэтгэмж авах эрхтэй.

Тухайлбал, хүүхдээ дутуу төрүүлсэн даатгуулагч эх, үр хөндүүлсэн, жирэмслэлтийг эмнэлгийн аргаар таслуулсан эх хөдөлмөрийн чадвараа түр алдсаны тэтгэмж авна. Хөдөлмөр эрхэлж байгаад хууль тогтоомжид заасны дагуу хүүхдээ асрах чөлөөтэй байх хугацаанд дахин хүүхэд төрүүлсэн эхэд жирэмсний болон амаржсаны тэтгэмж олгоно. Энэ тохиолдолд эхийн чөлөөтэй байсан хугацааны хоёр удаагийн төрөлт хамрагдана.

Тэтгэмжийн даатгалд даатгуулж, шимтгэл төлсөн, хөдөлмөрийн гэрээгээр ажилладаг, төрийн албан хаагч эхэд жирэмсний болон амаржсаны тэтгэмжийг даатгалын шимтгэл төлсөн сүүлийн 12 сарын хөдөлмөрийн хөлс, түүнтэй адилтгах орлогын дунджаас 100 хувиар, харин сайн дураар даатгуулсан эхэд тэтгэмжийг 70 хувиар тооцон дөрвөн сарын хугацаанд Нийгмийн даатгалын сангаас олгоно. Тэтгэмжийг ажлын өдрөөр тооцно.

ХҮҮХЭД АСАРСАН ХУГАЦАА АЖИЛЛАСАН ЖИЛД ТООЦОГДОХ УУ?

-Нийгмийн даатгалын шимтгэл төлсөн хугацаанд ямар хугацааг тооцох вэ. Тэтгэмжтэй чөлөө авч хүүхдээ асарсан хугацааг шимтгэл төлж, ажилласанд тооцогдох уу? /"Газар далай” ХХК-ийн захирал
Б.Нарантуяа/

-Шимтгэл төлсөн нийт хугацааг тодорхойлохдоо тэтгэврийн ба тэтгэмжийн даатгалын шимтгэлийг ажил олгогчоос мөн даатгуулагч өөрөө төлсөн нийт хугацаан дээр шимтгэл төлсөн хугацаанд оруулан тооцохоор хуульд заасан бусад хугацааг нэмж тооцно.

Төр, аж ахуйн нэгж, байгууллагаас дараах хугацааны шимтгэлийг тэтгэврийн болон тэтгэмжийн даатгалын санд төлсөн тохиолдолд эдгээр хугацааг шимтгэл төлсөн хугацаанд оруулан тооцно.

Тухайлбал, хөдөлмөрийн гэрээгээр ажиллагч болон төрийн албан хаагч, аж ахуйн нэгж, байгууллагын захиалгаар ажлаас чөлөөлөгдөж суралцсан, цэргийн жинхэнэ албыг байлдагч, түрүүчээр хаасан, тэтгэмжтэй чөлөө авч хүүхдээ асарсан хугацаа орно.

Таны асуусан хугацаа шимтгэл төлж, ажилласан хугацаанд орж тооцогдоно.

Нийгмийн даатгалын ерөнхий газрын Мэдээлэл, арга зүй хариуцсан мэргэжилтэн, улсын байцаагч И.Гончиг