Засгийн газар яг одоо ээлжит бусаар хуралдаж байгаа бөгөөд БНХАУ-ын Ухань хотод байгаа Монгол иргэдийн асуудлыг хэлэлцэж байна гэж Гадаад харилцааны яамнаас мэдээллээ. 

Шинэ коронавируст халдварын эрсдлээс урьдчилан сэргийлэх чиглэлд хэрхэн ажиллах талаар Засгийн газар хэлэлцэж байгаа бөгөөд хуралд  Эрүүл мэнд, Гадаад харилцаа, Хөдөлмөр, нийгмийн хамгаалал, БСШУС-ын сайд, дэд сайд, хотын дарга оролцож байна. 

Хуралдаанаар гаргасан шийдвэрийн талаар бид эргэн мэдээлэх болно. 

2020.01.26-ны өдрийн 9:00 цагийн байдлаар
Дэлхийн эрүүл мэндийн байгууллагын мэдээгээр шинэ Коронавирусийн халдвараар 1318 хүн өвчилж, 41 хүн нас барсан. БНХАУ-д 1287, Тайванд 3, Макаод 2, Хонгконгд 5, Японд 2, БНСУ-д 2, Сингапурт 3, Вьетнамд 2, Австралид 1, АНУ-д 2, Тайландад 5, Непалд 2, Францад 3 хүн өвчилсөн.

БНХАУ-ын Эрүүл мэндийн яамнаас мэдээлснээр 2020 оны 1 дүгээр сарын 26-ны өдрийн 08:50 цагийн байдлаар Хятад улсад шинэ коронавирусын халдвараар 1975 хүн өвчилж, 56 хүн нас барсан, 324 хүн сэхээн амьдруулах тасагт эмчлэгдэж байна. Бүрэн эдгэрсэн 49 иргэн эмнэлгээс гарсан.

БНХАУ-ын Өвөр Монголд 7, Манжуурт 2, Шилийн голд 1, Эрээнд 4 сэжигтэй тохиолдол бүртгэгдсэн гэж Эрүүл мэндийн яамнаас мэдээллээ. 

Засгийн газрын хуралдаанаар Их, дээд сургууль болон Мэргэжил сургалт үйлдвэрлэлийн төвүүдийн үйл ажиллагааг 2020 оны гуравдугаар сарын 2-ныг хүртэл хаах шийдвэрийг гаргалаа. 

БНХАУ-ын Ухань хотод байгаа оюутнуудаа татаж авах, хилээр орж гарч байгаа зорчигч, автотээврийн хэрэгслийн хөдөлгөөнийг хязгаарлах эсэх зэрэгтэй холбогдуулан Засгийн газраас гаргасан бусад шийдвэрийн талаар Шадар сайд болон бусад сайд нар мэдээлэл өгч байна. 

Шадар сайд Ө.Энхтүвшин "Өнөөдөр Монгол Улсад коронавирус илрээгүй боловч урьдчилан сэргийлэх ажиллагааг сайтар хэрэгжүүлэх нь чухал учраас бид дараах шийдвэрийг гаргалаа. 

1. Эрүүл мэндийн тусламж үйлчилгээний бэлэн байдлыг хангах, эмч эрүүл мэндийн ажилтнуудын илүү цагийн хөлсийг олгох, маск, халуун хэмжигч, мананцар үүсгэж халдваргүйжүүлэгч зэрэг тоног төхөөрөмжийг авах зардлыг шийдэхээр боллоо.  
2. Хилийн боомтоор зорчих иргэдийн хөдөлгөөнийг хязгаарлах асуудлыг 2020 оны 1-р сарын 30-ны дотор шийдвэрлэхийг Гадаад харилцааны сайд болон холбогдох албан тушаалтнуудад даалгалаа. Ингэхдээ явган болон авто тээврийн хөдөлгөөнийг хамруулж байгаа бөгөөд агаарын тээвэр болон галт тэргээр зорчих хөдөлгөөнийг оруулаагүй гэв.
3. Их, дээд сургууль болон МСҮТ-ийн үйл ажиллагааг гуравдугаар сарын 2-ныг хүртэл зогсоохоор боллоо. 
4. Найрамдал зуслан болон хүүхэд хамруулсан, олон нийтийг хамарсан үйл ажиллагааг мөн хугацааг хүртэл зогсоохоор боллоо. 
5. Цахим болон теле хичээлийг зохион байгуулна. 
6. БНХАУ-ын Ухань хотод байгаа оюутнуудыг даруй авчрах асуудлыг шийдвэрлэхийг Шадар сайд болон БСШУС-ын сайд Ё.Баатарбилэг нарт даалгасан" гэлээ.