Хятадын эрх баригчид биткойны арилжааг дотооддоо хориглохоор төлөвлөж байгаа аж. Дөрвөн жилийн өмнөөс БНХАУ-д эрчимтэй хөгжиж эхэлсэн цахим валютын зах зээлийг тэд ийнхүү бага багаар хумисаар байна.

Тус улсын төв банк цахим валютаар арилжаа хийдэг Хятадын сайтуудыг хаах тухай бичгийг эцсийн байдлаар бэлэн болгосон тухай ойрын эх сурвалж мэдээлжээ.
 
Өнгөрсөн долоо хоногт эрх баригчид Хятад улсад цахим валютаар хувьцаа гаргаж, олон нийтээс санхүүжилт босгохыг хориглосон бол хэдэн сарын өмнөөс энэ төрлийн валютын хэрэглээг хумиж эхэлсэн юм.
 
Эрх баригчид 2017 он гарснаас хойш биткойн болон бусад цахим валютын дотоодын зах зээлийн судалгааг хийж эхэлжээ. Эхний ээлжид цахим валютаар дамжуулан мөнгө угаахыг хориглосон журам баталж байсан бол Биткойны үнэ төсөөлж байснаас хурдацтай өсөх болсноор дээрхтэй ижил эрс шийдвэрүүд гаргах болсон аж.
 
Биткойны ханш өсөх болсон нэг шалтгаан нь өнгөрсөн жилээс Хятадын иргэд юанийн үнэ унахтай зэрэгцэн цахим валют худалдан авах нь нэмэгдсэнтэй холбоотой байжээ. Онолын хувьд цахим валют нь уламжлалт банкны системийн хяналтаас ангид байдаг учраас хэрэглэгч өөрийн мөнгөө хэнд ч мэдэгдэхгүйгээр Хятадаас гаргах боломжтой гэсэн үг юм.
 
Энэ асуудлаар Хятадын төв банкнаас тайлбар өгөхөөс татгалзсан бөгөөд сүүлийн хэдэн сарын турш эрх баригчид цахим валютын эсрэг ямар арга хэмжээ авах тухай бодсоор эцэст нь бүр мөсөн зогсоох шийдвэрт хүрсэн гэж зарим эх сурвалжууд хэлжээ.

Өнөөдөр нэгж Биткойны үнэ 4279 ам. доллартой тэнцэж байгаа нь есдүгээр сарын нэгний өдрөөс 16 хувиар буурсан тоо юм. 5000 ам. доллар шүргэсэн Биткойн болон бусад цахим валютын үнэ унах болсон нь Хятадын эрх баригчдын гаргаж буй шийдвэрүүдтэй холбоотой.