Тусгай олимпын зуны 15 дугаар наадмаас

Онцлох

Шинэ

Тренд

Буцах

Тусгай олимпын зуны 15 дугаар наадмаас

Б.Чимэг

Спорт

2019-03-16

Б.Чимэг

Спорт

2019-03-16

Оюуны хөгжлийн ялгаатай хүмүүст зориулсан “Тусгай олимп” хөдөлгөөн үүсээд 50 жил болж байна. Яг л энгийн олимпийн адилаар дөрвөн жилийн циклтэй, хоёр жилийн зайтайгаараа өвөл зуны наадмаа ээлжлэн хийдэг.

Энэ удаа Арабын Нэгдсэн Эмират улсын нийслэл Абу Даби хотноо Зуны XV наадам болж байгаа бөгөөд гуравдугаар сарын 14-нд нээлтээ хийлээ.

Долоон шэйхт улсын нэгдэл, Арабын Эмират энэ өдрүүдэд Тусгай олимпоор амьсгалж байна. Соёл уламжлал, шинэчлэл хөгжлөө хослуулан аль сайхнаа дэлхийн 190 орны зочдод гайхуулж, мөнхүү өөрснөө тэднийг ихэд хүндэтгэн хөл алдаж байна.

Энд байгаа хүн бүр өөрийн зовлон, өөрийн жаргалтай. Энэ өглөө тэдэнд юу эс тохиолдсон байх вэ. Харин тэднийг энд “үл ялгах үзэл санаа” нэгтгэж, “алив биднийг хайрла, хүндлэ” гэж цэнгэлдэх хүрээлэнгээс дууджээ.

Та хүн болж төрсөн л бол энд хаанаас ирсэн, хэн гэдэг, юунд дуртай нь чухалгүй. Зүгээр л бүжиглэ, баярла, хайрла... Энэ бол таны өдөр.

Тамирчид улсынхаа нэрийг дуудуулан гарч ирсний дараа олимпийн бамбар залах ёслол эхэллээ. Тэд ярагдан зам гаргаж, тамирчид жижиг галыг өртөөлөн дамжуулсаар бамбарыг асаав. Энэ үүссэн замыг улс улсаас ирсэн өндөр дээд цолтой цэргийнхэн бэлгэ тэмдэг байдлаар хамгаалан зогслоо. Учир нь тусгай олимпийн үзэл санааны тугийн дор нэгдсэн нэгэн томоохон салбар бол улс орнуудын хүчний байгууллагууд юм. Тэд бамбарын буухиаг хариуцдаг.

Эмиратчууд үнэхээр их хүчин чармайлт гаргажээ. Тусгай олимпийн нээлт урьд урьдныхаасаа ч сайхан, дэлгэр боллоо. Харин маргааш өглөө энд ирсэн бүх хүний алба эхэлнэ. Уралдах нь уралдаж, бичих нь бичнэ...

Монголын тусгай олимпийн тамирчид хорин наймуулаа, спортын дөрвөн төрлөөр хүч үзэхээр энэ улсад иржээ. Ялахын төлөө уралдаж, хүн бүр түүнийг дэмжин шүгэлдэнэ. Ялахгүй байсан ч Тусгай олимпийн хөдөлгөөн тэдэнд ялахын төлөөх тэмцлийг бэлэглэлээ.