Сүмо бөхийн дээд зиндаанд барилдаж буй цорын ганц ёкозүна (аварга) Тэрүнофүжи Г.Ган-Эрдэнэ тавдугаар сарын тэмцээн буюу Нацү башёд түрүүллээ.

Аравдугаар сард сэдэрсэн өвдөгний бэртлийн улмаас өмнөх хоёр тэмцээнийг дараалан өнжөөд байсан аварга сүмо бөхийн дээд зиндаанд найм дахь удаа түрүүлж эзэн хааны цомыг өргөж байгаа нь энэ юм.

Өдгөө 31 настай тэрээр 14 давж 1 унасан амжилттайгаар түрүүлсэн бол зүүний маэгаширагийн 14-өөс барилдсан Асанояма 12 даваа 3 унаатай удаалав.

Харин Монгол бөхчүүдээс, сэкивакэ цолтой Кирибаяма Б.Лхагвасүрэн 11 даваа 4 унаатай тэмцээнийг дуусгаснаар ирэх долоодугаар сарын тэмцээнд чансаа дэвшиж озэки цолтой барилдах нь тодорхой боллоо.

27 настай тэрээр комүсүби болон сэкивакэ цолтойгоор сүүлийн гурван тэмцээнд нийт 34 даваа аваад байна. Одоогоор цол ахих стандарт үзүүлэлт нь 33 даваа байгаа юм.

Түүнчлэн

• 24 настай сэкивакэ Хошорюү С.Бямбасүрэн 11 даваа 4 унаа,
• 32 настай маэгашира 13 Чиошома Г.Мөнхсайхан 8 даваа 7 унаа
• 22 настай маэгашира 11 Хокүсэйхо А.Даваанинж 8 даваа, 7 унаа
• 39 настай маэгашира 7 Тамаваши Б.Мөнх-Оргил 7 даваа, 8 унаа
• 29 настай маэгашира 11 Даишохо Ч.Шижирбаяр 6 даваа 9 унаа
• 29 настай маэгашира 16 Миторюү Б.Төрболд 5 даваа, 10 унаатайгаар Нацз башёг дуусгалаа.