Автотээврийн үндэсний төвөөс тээврийн хэрэгслийн улсын бүртгэлийн дугааруудыг худалдах нээлттэй цахим дуудлага худалдааг зарлажээ. Зам, тээврийн хөгжлийн сайдын 2022 оны долоодугаар сарын 06-ны өдрийн А/207 тоот тушаалаар батлагдсан “Tээврийн хэрэгслийн улсын бүртгэлийн дугаарын дуудлага худалдааг зохион байгуулах журам”-ын хүрээнд тээврийн хэрэгслийн улсын бүртгэлийн дараах дугааруудыг худалдах нээлттэй цахим дуудлага худалдааг явуулах болжээ.

Дуудлага худалдаа 2024 оны аравдугаар сарын 07-ны өдрөөс 2024 оны арванхоёрдугаар сарын 16-ны хооронд үе шаттайгаар явагдана.

Иргэд auction.transdep.mn хаягаар нэвтэрч, сонирхсон дугаараа сонгох ба дугаараас шалтгаалж дуудлага худалдаанд тавих дэнчингийн хэмжээ өөр өөр. Тухайлбал: 

• 000А, АААА дугаар - 2 сая төгрөг
• 00А0, 0ААА, А000, 00АА, 0А00 дугаар- 500 мянган төгрөг 
• 00АВ, АВАВ, АВВА, ААВВ, ААА0, АААВ болон бусад 20 дугаар, орон нутгийн дугаар- 100 мянган төгрөгийн дэнчинг дуудлага худалдаанд оролцохоо баталгаажуулж байршуулна.  

Дуудлага худалдаанд оролцогч тухайн өдрийн дуудлага худалдаанд нэг л удаа  оролцох эрхтэй.

Дуудлага худалдааны бүртгэл: Оролцогчдыг тухайн оролцож буй дуудлага худалдаа явагдахаас гурав хоногийн өмнөөс эхлэн цахимаар бүртгэн, дэнчинг хүлээн авах бөгөөд дуудлага худалдаа явагдах өдрийн өмнөх өдөрт 23 цаг 00 минутад бүртгэлийг хаах юм байна. 

Худалдан авах гэрээний нөхцөл: Хамгийн өндөр үнэ өгсөн оролцогч нь тухайн дуудлага худалдааны ялагч болох бөгөөд худалдан авсан улсын дугаарын үнийг 24 цагийн дотор төлж, “Улсын бүртгэлийн дугаар олгох гэрээ” байгуулснаар баталгаажна. Ялагч нь заасан хугацаанд төлбөрөө төлөөгүй тохиолдолд дэнчингийн төлбөрийг буцаан олгохгүй. Төлбөрөө бүрэн төлснөөс хойш ажлын таван өдөрт багтааж өөрийн өмчлөлийн тээврийн хэрэгсэлд дугаараа байршуулах үүрэгтэй гэж АТҮТ-өөс мэдээлэв. 

Дуудлага худалдаатай холбоотой бусад мэдээллийг 70070030, 1900-1234 дугаар холбогдон авах боломжтой.