Монголын Цахилгаан Холбоо ХК-аас үүрэн телефоны бүх дугаар руу үнэгүй дуудлага хийх боломжтой утасны бүхээгийг төв салбарынхаа гадна талбайд байршуулжээ.

Энэ талаар "Монголын цахилгаан холбоо" ХК-ийн маркетингийн менежер М.Наранцацрал "Иргэдэд утасны цэнэг дууссан, нэгжгүй болсон зэрэг зайлшгүй шаардлага тулгарсан үед туслалцаа үзүүлэх зорилгоор энэхүү үйлчилгээг нэвтрүүлсэн. Үүрэн телефоны бүх оператор компанийн дугаар руу 204 угтвар тоог хийгээд хоёр минут үнэгүй ярих боломжтой. Автоматаар хоёр минут болоод утас тасарна. Гэхдээ дахин шинээр дуудлага хийгээд яриагаа үргэлжлүүлж болно.

Эмнэлэг, цагдаа, онцгой байдлын 101, 102, 103 дугаарт угтвар тоо хийлгүй шууд залгана. Мөн албан байгууллага, мэдээллийн лавлах, зэрэг тусгай дугааруудад болон гадаад утас руу холбогдох боломжгүй.

Дуудлага хийхээс гадна утсаа цэнэглэх боломжтой. Цаашлаад ирэх хавраас 24 цаг үнэгүй интернет ашиглах боломжоор хангахаар компьютер байршуулсан байгаа. Улаанбаатар хотын хэмжээнд нэг утасны бүхээг байрлуулсан. Ирэх онд сургууль, эмнэлгийн орчин, олон нийтийн худалдааны төвд байрлуулахаар төлөвлөж байгаа" гэв.

Энэхүү утасны бүхээг нь Монголын цахилгаан холбоо ХК буюу Төв шуудангийн хажууд байнга байрших аж.