Ширээний теннисний "Оч" клубт 2010-2011 оны тав дахь удаагийн лигийн тэмцээн явагдаж байна. Энэ удаагийн лигийн тэмцээнийг "Ажнай" корпораци ивээн тэтгэн явуулж байгаа юм.

Тэмцээний дүн ирэх амралтын өдрүүдэд гарна. Шинэ оны лигийн тэмцээнд "Гранд Фин", "АПУ-Боргио", "Хангарьд", Төмөрт Транс", "Бласт", "Ажнай", "Петровис", "Булигаар" багууд өрсөлдөж байна. Лигийн тэмцээний эхний хоёр тойргийн тоглолтын өрсөлдөөний дараа "Гранд Фин", "АПУ-Боргио", "Петровис", "Хангарьд" багууд эхний дөрвөн байрыг эзэлж хагас шигшээд шалгараад байгаа юм.

Одоогоор хамгийн олон хожилтой тэргүүн байрт яваа "Гранд Фин" баг "Хангарьд" клубийн багийг 2:0-ийн харьцаатай хожиж шигшээд шалгарсан бол "АПУ-Боргио" багийн тамирчид "Петровис" багийг гурван үеийн ширүүн өрсөлдөөний дараа 2:1-ээр өрсөлдөгчөө ялсан байна. Ирэх 26-ны өдөр энэ оны лигийн аваргын төлөө "Гранд Фин", "АПУ-Боргио" багууд тоглох бол хүрэл медалийн төлөө "Хангарьд", "Петровис" багууд хүч үзэхээр боллоо.

Монголын ширээний теннисний холбоо лигийн тэмцээний туршид тамирчдын нэг бүрчилсэн тоглолтын чансааг гаргаж амжилттай тоглосон тамирчдаа тухайн жилийн тив дэлхийн чанартай тэмцээнд оролцуулж байхаар шийдвэрлэсэн байна.

Энэ жилийн лигийн эрэгтэй тэргүүн тоглогчоор Монгол Улсын хоёр удаагийн аварга, спортын мастер Б.Баярмагнай шалгарч 500 мянган төгрөгний шагнал хүртлээ. Харин эмэгтэй тамирчдаас Монгол Улсын зургаан удаагийн аварга, ОУХМ Б.Батхишиг шалгарч 400 мянган төгрөгийн эзэн болж энэ онд улсаа төлөөлөн олон улсын тэмцээнүүдэд оролцох эрхтэй болов.

http://niigmiintoli.mn/