Улсын Онцгой комиссын 14 дэх удаагийн хуралдаан өнөөдөр 14:00 цагаас болно гэж Шадар сайдын хэвлэлийн албанаас мэдээллээ. Өнөөдрийн хуралдаанаар иргэдийн тусгаарлах хугацааг сунгах эсэх асуудлыг хэлэлцэх юм байна. 

УОК-ын 13 дахь удаагийн хуралдаан гуравдугаар сарын 20-ны баасан гарагт болж өндөржүүлсэн бэлэн байдлын хэсэгчилсэн зэрэгт шилжүүлсэн хугацааг дөрөвдүгээр сарын 30-ныг хүртэл сунгах шийдвэр гаргасан.

Ингэснээр бүх шатны сургууль, цэцэрлэгийн үйл ажиллагаа, олон улсын нислэг, хил хаах хугацааг сунгасан юм.

Улсын Онцгой комиссын хуралдаан үргэлжилж байна. Хуралдаанаар тусгаарлах хугацааг 21 болгож байгаа талаар Засгийн газрын хэвлэл мэдээлэлтэй харилцах хэлтсээс мэдээллээ. Учир нь олон улсын судалгааны дүнгээр нууц үе 5.5-19 хоног байгаа тул ийнхүү сунгах нь зүйтэй гэж үзжээ. 

ТУСГААРЛАХ БАЙРАНД НЭГ ӨРӨӨНД НЭГ ХҮН БАЙЛГАХ НЬ ЗҮЙТЭЙ ГЭЖ ҮЗЛЭЭ

Улсын Онцгой комиссын 14 дэх удаагийн хуралдаанаар иргэдийг тусгаарлах хугацааг сунгах эсэх асуудлыг хэлэлцсэн байна. Эрүүл мэндийн яамнаас тусгаарлах хугацааг 21-28 сунгах санал ирсэн бөгөөд өмнө нь тусгай нислэгээр ирсэн 1000 орчим иргэнийг дахин 7 хоног тусгаарлахаар боллоо.  

ДЭМБ-ын тусгаарлалтын хоногийг 5.5-19 хоног байлгах тухай зөвлөмжийн дагуу мөн Истамбул-Улаанбаатар чиглэлийн захиалгат нислэгээр ирсэн иргэнээс 8 хоногийн дараа шинэ коронавирус илэрсэн тул сэжигтэй иргэдийг тусгаарлах тусгаарлалтын 14 хоногийг сунгаж 21 болголоо.  Гэнэтийн шийдвэр гарч байгаа тул одоо тусгаарлалтад байгаа 1000 гаруй иргэнд санхүүгийн дарамт ачаалал үүсгэхгүй. Нэмэлт долоо хоногийн тусгаарлалтын байр, хоолны  350-500 хүртэл сая төгрөгийн зардлыг Засгийн газрын нөөц сангаас гаргахаар тогтлоо.

Мөн иргэдийг нэг өрөөнд нэг хүн байхаар зохицуулах шаардлага үүссэн тул дөрөвдүгээр сард хийхээр төлөвлөсөн Сөүл, Токиогийн нислэгийн нэг буюу дөрөвдүгээр сарын 4-ний өдрийн Сөүл чиглэлийн нислэгийн хугацааг түр хугацаагаар хойшлуулахаар болсон байна.

Тодруулбал, 2020.04.02-нд Улаанбаатар-Сөүл-Улаанбаатар, 2020.04.03-нд Улаанбаатар-Токио-Улаанбаатар чиглэлд тус тус захиалгат нислэг үйлдэнэ. Тус нислэгээр Монгол Улсад ирэх иргэдэд шинэ коронавирусын шинжилгээнд хамрагдсан бөгөөд халдвар аваагүй байх, тусгаарлах байрны 1,050.000 төгрөгийн төлбөрөө төлсөн, ирээд 21 хоног дэглэмийн дагуу тусгаарлалтад байх шаардлагыг тавих юм. 

Нэг өрөөнд нэг хүн байхтай холбоотойгоор тусгаарлах байрны хүрэлцээ хомсдож байгаа тул хувийн зочид буудлуудыг хуулийн хүрээнд дайчилгаанд хамруулах нөхцөл байдал үүсээд байгааг ОБЕГ-ын дарга Т.Бадрал мэдээллээ.