Ерөнхий сайд Л.Оюун-Эрдэнэ бүрдүүлсэн Засгийн газрын гишүүдээ УИХ-д танилцуулж, УИХ-ын гишүүд нэр дэвшигчдээс асуулт асууж, үг хэлж байна.

Энэ үеэр УИХ-ын гишүүн Г.Мөнхцэцэг Соёлын сайдаар томилогдохоор болоод буй Ч.Номингоос ажлаа хүлээн аваад юуг хамгийн түрүүнд хийх талаар тодруулсан юм.

Соёлын сайд Ч.Номин “Энэ салбар бол ковидод нэрвэгдээд маш их асуудалтай байна гэж ойлгож байна. Манай Засгийн газрын мөрийн хөтөлбөрт музей, номын сан зэрэг барилга байгууламж зэрэг бүтээн байгуулалтын ажлыг үргэлжлүүлнэ. Өмнөх сайдын ажлыг үргэлжлүүлэн авч явна гэж бодож байна. Засгийн газрын бодлого тогтвортой байх ёстой гэж би боддог. Урлагийн байгууллагын ажилчдын нийгмийн асуудалд хамгийн түрүүнд анхаарал тавьж ажиллана гэж бодож байна” гэлээ.

УИХ-ын дарга Г.Занданшатар түүнийг хариулсны дараа ард иргэдийг соён гэгээрүүлэх үйлсэд үнэтэй хувь нэмэр оруулсан гэдгийг онцолсон юм.

Ерөнхий сайд Л.Оюун-Эрдэнэ "Соёлын салбарт эдийн засгийн хөшүүрэг орох ёстой гэдэг үүднээс Ч.Номинг сайдаар урьж ажиллуулж байна. Яагаад бид Холливүдийн хэмжээний кино, яагаад The Hu шиг хамтлаг дахин гаргаж ирж болохгүй гэж. Үүнийг л Ч.Номинг хийж чадах болов уу гэж итгэж байна. Тиймээс төрд ажилласан туршлагагүй ч гэсэн түүнийг сайдаар урьж ажиллуулж байна. Цаг хугацаа харуулах болов уу" гэсэн юм.