Азийн наадмын аварга, Хөдөлмөрийн баатар, Гавьяат тамирчин, Дархан аварга Дашдоржийн Цэрэнтогтох /1951 -2015/ mаалал төгслөө.

Чөлөөт бөхийн нэрт тамирчин, Азийн наадмын аварга, Хөдөлмөрийн баатар, Дархан аварга Дашдоржийн Цэрэнтогтох 2015 оны наймдугаар сарын сарын 26-ны өдөр зуурдаар нас барлаа.

Д.Цэрэнтогтох нь 1951 онд Өвөрхангай аймгийн Нарийнтээл суманд төрж, 1971 онд цэргийн албанд татагдаж Ардын армийн “Алдар” спорт хороонд тамирчин болжээ. Ардын багш, Гавьяат дасгалжуулагч Ч.Дамдиншаравын шавь болж, чөлөөт бөхийн спортоор хичээллэж эхэлсэн байна. Тэрээр “Хөдөлмөр” нийгэмлэг, чөлөөт бөхийн үндэсний шигшээ багт он удаан жил тамирчин байсан юм.

Д.Цэрэнтогтох аварга 1974 онд спортын мастер, 1980 онд олон улсын хэмжээний мастер цол хүртэж, чөлөөт бөхийн дэвжээг олон жилийн турш чимэн, Бүх ард түмний спартакиадаас алт, УАШТ-нээс 6 алт, тус бүр мөнгө, хүрэл медаль хүртжээ.

Үндэсний бөхөөр барилдаж 1972 онд Улсын начин, 1977 онд Улсын заан, 1978 онд Улсын арслан, 1979 онд онд Улсын аварга, 1980 онд Даян аварга, 1981 онд Дархан аварга цол хүртэж, төрийн наадамд дөрвөн удаа, Цагаан сарын барилдаанд гурван удаа түрүүлж байлаа.

1976, 1980 онуудын Зуны олимпийн наадамд зодоглож, 1980 онд ОХУ-ын Москва хотод болсон Зуны олимпийн наадамд Ү байр эзэлж, ДАШТ-нд 1974-1975, 1978-1979 онуудад 4 удаа эх орноо төлөөлөн оролцсон юм.

Мөн АНУ-ын Толидо хотод болсон Дэлхийн цомын төлөө тэмцээнээс 1975 онд мөнгө, 1981 онд хүрэл, Азийн спортын наадмаас 1974 онд Иран улсын Тегеран хотод алт, 1982 онд Энэтхэг улсын Нью-Дели хотод мөнгөн медаль хүртэж байлаа.

Олон улсын “Интернациональ” тэмцээнээс мөнгө, 1977, 1979 онуудад хошой алт, 1974 онд Ардчилсан Герман улсад болдог олон улсын тэмцээнээс мөнгө, Польш улсад болдог олон улсын тэмцээнээс мөнгө, Румын улсад болдог олон улсын тэмцээнээс 1976 онд мөнгө, Гүрж улсын Тбилис хотод болдог олон улсын тэмцээнээс 1980 онд хүрэл, Узбек улсад болдог олон улсын тэмцээнээс 1982 онд мөнгө, Ах дүү армиудын аварга шалгаруулах тэмцээнээс хошой алтан медаль авч байжээ.

Түүний спортын талбарт гаргаж байсан өндөр амжилтыг үнэлж, “Биеийн тамир спортын тэргүүний ажилтан” цол тэмдэг, МҮОХ-ны “Алтан медаль”, ойн медалиудаар урамшуулж, 1991 онд Гавьяат тамирчин, 2006 онд Хөдөлмөрийн баатар цолоор шагнажээ.

Монголын ард түмний хайртай бөх Д.Цэрэнтогтох аваргын гаргасан спортын гарамгай амжилт дэлхийн болон монголын чөлөөт бөхийн түүхэнд мөнхрөн үлдэж, хойч үеийн залуучуудад бахархан дууриах үлгэр жишээ болно. Түүний инээмсэглэл дүүрэн нүүр царай, даруу төлөв зан, уран хурц барилдаан, угсраа олон мэх бидний зүрх сэтгэлд үүрд хадгалагдах болно.

Манай улсын чөлөөт бөхийн спортод хүнд гарз учирсанд түүний ар гэр, үр хүүхэд, ач зээ, ахан дүүс, хамаатан саданд бид гүн эмгэнэл илэрхийлж байна.