#CS2 The Mongolz "Esports World Cup"-ын эхний тоглолтдоо хожигдлоо. Өмнө тоглохдоо хожигдсон G2 Esports тэднээс даагаа нэхэв.

Электрон спортын түүхэд байгаагүй хамгийн өндөр шагналын сантай (Нийт шагналын сан 60 сая ам.доллар) "Esports World Cup" наадам электрон спортын 22 төрлөөр Саудын Арабын нийслэл Эр-Рияд хотод үргэлжилж байна.

Наадмын гол спортуудын нэг CS2 (Counter Strike 2)-ын 1 сая ам.долларын шагналын сантай тэмцээн өнөөдөр эхэлсэн бөгөөд Ази тивийг төлөөлөн Монголын "The MongolZ" баг оролцож байна.

Тэд эхний тоглолтоо дэлхийн чансааны зургаад бичигдэж буй "G2 Esports" багтай хийж 2-0 (Ancient 11-13, Inferno 13-16) харьцаагаар хожигдлоо.

• 48 дахь удаагийн ESL Challenger League-т Монголын зургаан баг оролцоно
• ДОЛООДУГААР САРЫН СПОРТ: Э-Спортын их наадам болно
• The Mongolz "YaLLa Compass 2024"-т түрүүлж 200 мянган ам.доллар авлаа

Ийнхүү тэмцээний нээлтийн шатанд хожсон G2 Esports "Playoffs" шатанд тоглох эрхтэй боллоо.

Харин The Mongolz хожигдсоноор "Resurrection Stage" шатанд тоглох болов. Тус шатны бүх тоглолт ганц map-аар шийдэгдэх бөгөөд ердөө нэг баг Playoffs-т тоглох эрхийг авна.

Хоёр баг өмнө нь "ESL Pro League S19"-ын хүрээнд тоглоход монгол баг 2-0 (Ancient 13-4, Anubis 13-7) харьцаагаар хожиж байв.

"Esports World Cup 2024" наадмын CS2 төрөлд Монголын "The MongolZ" оролцож байгаагаас гадна Mobile Legends төрөлд Монголын "IHC Esports" баг оролцож 20-р байрыг эзлэн 36 мянган ам.доллар аваад харьсан. Мөн PUBG Mobile төрөлд Монголын "IHC Esports", "Falcons Force", "4Merical Vibes" багууд оролцоно. Тэд энэ сарын 19-өөс тоглож эхэлнэ.