#CS2 Португалд болох "BLAST Open Spring 2025" тэмцээнд ATOX-ыг орлож The Huns Esports оролцохоор болжээ.

Монголын CS2-ын томоохон төлөөлөл "ATOX Esports" баг Португалд болох "BLAST Open Spring 2025" тэмцээн болон одоо Улаанбаатарт болж буй "MESA Asian Masters" тэмцээнүүдээс түдгэлзүүлсэн гэж HLTV мэдээллээ.

Тоглолт наймаалцах, допинг, хууран мэхлэхийн эсрэг тэмцдэг Британийн "ESIC (Esports Integrity Commission)" байгууллагаас ATOX-ыг шалгаж эхэлсэнтэй холбоотойгоор тэмцээн зохион байгуулагч "BLAST" болон "PGL" одоо болж буй болон ATOX-ын эрхээ авсан тэмцээнээс нь хассан байна.

Тодруулбал, ATOX энэ сарын 19-д Португалын Лисбон хотод болох "BLAST Open Spring 2025" тэмцээнд оролцох эрхээ "BLAST Rising Asia Spring 2025" тэмцээнд түрүүлэн аваад байсан бол тэдний эрхийг түдгэлзүүлж хоёрт орсон "The Huns Esports"-т шилжүүлжээ.

• The MongolZ өнөөдөр GamerLegion-тэй тоглоно
• "The MongolZ" баг Монгол Улсын үндэсний шигшээ багийн бүрэлдэхүүнд нэгдлээ
• СПОРТЫН ЦАГЛАВАР: 2025 оны гуравдугаар сар

Мөн яг одоо үргэлжилж буй, өнөөдөр 10:00 цагаас тоглох байсан "MESA Asian Masters 2025" тэмцээнээс хассан байна. Энэ тэмцээнд түрүүлсэн баг нь "PGL Bucharest" тэмцээний эрхийг авах юм. Тус тэмцээнд ATOX багийг орлож Азийн урьдчилсан шатанд тоглосон "Eruption" оролцохоор болжээ.

Энэхүү түр хугацаанд түдгэлзүүлсэн шийдвэрээс илүү дэлгэрэнгүй мэдээллүүд гараагүй байгаа боловч өнгөрсөн есдүгээр сард болсон "ESL Pro League Season 20" тэмцээний үеэр тоглолт наймаалцсан байж болзошгүй гэсэн шуум яриа гарсан.

BLAST Open Spring 2025 тэмцээний оноолтууд гарсан бөгөөд The Huns Esports эхний тоглолтоо дэлхийн чансааг тэргүүлэгч Оросын "Team Spirit"-тэй хийнэ.

Эх сурвалж: HLTV