Агаарын бохирдол, утааны асуудлаар ерөнхий хяналтын сонсголын бэлтгэлийг хангах, зохион байгуулах үүрэг бүхий ажлын хэсгийн гишүүд өнөөдөр /2025.01.21/ Тавантолгой түлш ХХК-ийн төвийн бүсийн үйлдвэрийн үйл ажиллагаатай танилцлаа.

Тус үйлдвэр нь 2018 оноос хойш бүтээгдэхүүн үйлдвэрлэж эхэлсэн бөгөөд нийслэлийн түлшний хэрэгцээний 35 хувийг хангадаг. Технологийн хоёр шугамаар хоногт 900-1000 тонн түлш үйлдвэрлэдэг бөгөөд 300 гаруй ажилтантай.

Сайжруулсан шахмал түлш хоёр л үндсэн орцтой. Түлшний 95 хувь нь үндсэн түүхий эд болох мидлинг буюу нүүрс. Үлдсэн 5 хувь нь барьцалдуулагч.

Барьцалдуулагчийн хувьд өмнө нь дан БНХАУ-аас авдаг байсан бол одоо Монголын компаниудаас бас нийлүүлж буй. Ингэхэд үйлдвэрлэлийн процесст ямар нэг өөрчлөлт ороогүй. Мөн технологийн горим ч алдагдаагүй гэдгийг үйлдвэрийн Ахлах инженер Г.Сундуй хэлсэн.
Тавантолгой түлш нь “Гарааны баргил тех” ХХК болон “Баргилтрейд” ХХК-уудаас барьцалдуулагч нийлүүлж байна.

"Барьцалдуулагчийг дотооддоо үйлдвэрлэж буй учраас урдаас оруулж ирж байгаагаас хямд үнэтэй. Манайх 1 тонныг 2.5 сая төгрөгөөр худалддаг" хэмээн “Гарааны баргил тех” ХХК-ийн Үйлдвэрийн дарга Ө.Давааням өмнө нь мэдээлж байсан. 

Ажлын хэсгийн гишүүд төвийн бүсийн үйлдвэрийн үйл ажиллагаатай танилцаж, түлшний дээжээс химийн хүрээлэнд шинжлүүлэхээр авсан. Үүний үр дүнг хоёрдугаар сарын 3, 4-ний өдрүүдэд болох ерөнхий сонсголын үеэр танилцуулна гэсэн юм.

Түүнчлэн бүтээгдэхүүний чанарын шалгалтыг цаг тутамд 2-3 удаа хийдэг аж. Хатаахаас гарч буй түлш жиндээ хүрч буй эсэх, түлшний бэхжилт, чийг, нунтаг температур ямар хэмжээнд буйг тусгай аппаратаар хэмждэг. Түлшийг 140 градуст хатаадаг гэсэн. Түлшний чийгийг зургаагаас ихгүй хувьд барих ёстой байдаг гэнэ. Өнөөдрийн шалгалтын явцад чийг хоёр хувьтай гарсан.

УИХ гишүүн, Ажлын хэсгийн ахлагч Ж.Чинбүрэн үйлдвэрийн үйл ажиллагаатай танилцах үеэр ажлын орчин нөхцөл, ажилчдын эрүүл ахуйн талаар асуудлыг хөндсөн.
Тэрбээр, Үйлдвэрт 15 минут болоод гарч ирэхэд л тоосжилт маш их байгаа нь харагдаж байна. Ажилчид 5, 5 цагаар ээлжилдэг бол үүнийг дахиад богиносгох шаардлагатай юм байна.  

Ажилчид үйлдвэрлэл болон технологийн горим алдагдаагүй гэдгийг хэлж байна. Монгол улс түлшний MNS стандартыг 2-3 удаа шинэчилж байсан. Гэхдээ тэр шинэчилсэн стандарт нь үргэлж доогуур байдаг. Үйлдвэрийн ажилчид заасан стандартын дагуу үйлдвэрлэлээ явуулж байна. Тэгэхээр бид стандартыг асуудлыг ярих ёстой гэсэн юм.

Энэ сарын эхээр Ерөнхий сайд, Засгийн газрын зарим гишүүн, хотын дарга болон холбогдох албаныхан Тавантолгой түлш ХХК-ийн зүүн бүсийн үйлдвэрт ажилласан. 

Энэ үеэр Хотын дарга Х.Нямбаатар шахмал түлшний түүхий эдийг Тавантолгойн уурхайн “0” давхаргын стандартын шаардлага хангасан баяжуулсан нүүрсээр солино гэсэн. Мөн 147 мянга гаруй айл өрхөд стандартын шаардлага хангасан давхар шаталтат зуухыг нэвтрүүлж, эхний ээлжийн 32 мянган зуухны тендерийг энэ нэгдүгээр сард багтаан зарлана хэмээн мэдээлж байв. 

Энэ талаар Ажлын хэсгийн гишүүн, УИХ-ын гишүүн М.Ганхүлэгээс тодруулахад тэрбээр, Нийслэлээс утааны эсрэг авч хэрэгжүүлж буй арга хэмжээнүүдийг дэмжиж байгаа ч 28 тэрбум төгрөгөөр зуух авах саналыг дэмжихгүй байгаа гэсэн юм. 

Гэрэл зургуудыг Г.Өнөболд