Мобифинанс ББСБ нь 2018 онд анхны “Цахим мөнгө гаргах” тусгай зөвшөөрлийг гардаж байсан бол өнөөдөр тус зөвшөөрлөө ХУГАЦААГҮЙ сунгах болзлоо хангалаа.

Монгол улсад цахим мөнгөний үйл ажиллагаа явуулах албан ёсны зөвшөөрөлтэй нийт 7 байгууллага байдаг бөгөөд 4 жилийн хугацаатай зөвшөөрлийг Монголбанкнаас олгодог журамтай. Харин тухайн байгууллагын үйл ажиллагаа “Цахим мөнгөний журам”-д нийцэх эсэх, бизнес төлөвлөгөө нь нийгэм, эдийн засагт үр дүнтэй эсэх, мэдээллийн систем, техник технологийн аюулгүй байдлыг бүрэн хангаж буй эсэх зэрэгт үндэслэн ХУГАЦААГҮЙ тусгай зөвшөөрлийг олгодог байна.

Бид өнөөдрийг хүртэл 4 жилийн хугацаанд үйл ажиллагаа явуулахдаа цахим мөнгө болон мөнгөн хөрөнгийн аюулгүй, найдвартай байдлыг хадгалах, хамгаалах систем, техник технологи, боловсон хүчнийг бүрдүүлж, ISO стандартыг мөрдөн, Монголбанкны “Цахим мөнгөний журам”-ын шаардлагуудыг бүрэн ханган ажилласаар ирсэн.

Үүний үр дүнд Мобифинанс ББСБ нь Монголбанкны Ерөнхийлөгчийн тушаалаар “Цахим мөнгө гаргах” тусгай зөвшөөрлийг ХУГАЦААГҮЙ авч буй анхны бөгөөд ЦОР ГАНЦ байгууллага болж буйг дуулгахад таатай байна.

Мобифинанс ББСБ нь MonPay апликейшнаараа дамжуулан хэрэглэгчдийнхээ өдөр тутмын санхүүгийн харилцааг хамгийн хялбар, аюулгүй байдлаар шийдэхийн зэрэгцээ дээрх дүрэм журам, шаардлагуудыг хууль ёсны дагуу, бүрэн дүүрэн биелүүлж, хэрэглэгчдийнхээ мэдээллийн аюулгүй байдлыг найдвартай хамгаалан ажиллаж буйг энэхүү үйл явдал батлан харууллаа.

БИД МЭДЭЭЛЛИЙН АЮУЛГҮЙ БАЙДЛЫГ ХЭРХЭН ХАНГАЖ БАЙНА ВЭ?

Манай компани 2018 оноос эхлэн хэрэглэгчдийнхээ мэдээлэл болон мэдээллийн хөрөнгийг бүх төрлийн эрсдэлээс хамгаалах, эрсдэл үүссэн үед үр дагаврыг бууруулах болон түүнээс урьдчилан сэргийлэх зорилгоор  “Мэдээллийн аюулгүй байдлын удирдлагын тогтолцооны олон улсын стандарт ISO/IEC 27001:2013” –г үйл ажиллагаандаа нэвтрүүлсэн билээ.

Бид тус стандартын шаардлагын дагуу хэрэглэгч болон хамтрагч байгууллагуудынхаа үнэ цэнтэй  мэдээллийг боловсруулах, хадгалахад учирч болзошгүй эрсдэлээс сэргийлж, аюулгүй байдлын тогтолцоог бүрдүүлэн ажилласаар ирсэн.

Энэ жилийн хувьд бид ХБНГУ-ын DQS аудитын компаниар баталгаажуулалтын аудит хийлгэж, ISO/IEC 27001:2013 стандартын нөхцөлийг бүрэн ханган ажиллаж буйгаа дахин баталгаажуулж, гэрчилгээгээ гардан авлаа.

Энэ нь манай компани  хэрэглэгч, хамтран ажиллагч байгууллага, түншүүдийнхээ мэдээллийн аюулгүй байдлыг хангах, эрсдэлээс сэргийлэх, үүнийгээ байнга ханган ажиллах үүргээ нэр төртэй биелүүлэн ажиллаж буйн илрэл юм.

Мобифинанс ББСБ ХХК нь цаашид ч үйл ажиллагаандаа уг олон улсын стандартын шаардлагыг хангаж, Монгол Улсад мөрдөгдөж буй хууль, дүрэм журам, удирдлагын тогтолцоог тасралтгүй мөрдөн бүтээгдэхүүн үйлчилгээгээ улам бүр сайжруулан ажиллах болно.