Зөвшөөрөгдсөн 14 салбарын 4 нь хувийн хэвшил бөгөөд эдгээрийн ажилчид ажлын газрын тодорхойлолт, ажлын үнэмлэхийн хамт хувийн автомашинаар хөдөлгөөнд оролцох юм.

Нийслэлийн Засаг дарга Д.Сумъяабазар хоёрдугаар сарын 11-ний 02:00 цагийн үед бүх нийтийн бэлэн байдлын зэрэгт хэсэгчилсэн байдлаар шилжүүлсэнтэй холбогдуулан авч хэрэгжүүлэх зарим арга хэмжээний тухай захирамжийг танилцуулах үеэрээ "Нийтийн тээврийн хэрэгслийг тусгай чиглэлд шилжүүлэн зөвхөн хязгаарлалт тогтоогоогүй төрийн байгууллага, хуулийн этгээдийн ажилтан албан хаагчдыг зорчуулна. Хязгаарлалт тогтоогоогүй төрийн байгууллага болон хуулийн этгээдийн ажлын газрын тодорхойлолт, үнэмлэхийг үндэслэн 10-15 хувийг хувийн болон албаны тээврийн хэрэгслээр замын хөдөлгөөнд оролцуулахыг ТЦА-ны Замын цагдаагийн газрын дарга Жавхланбаатар, Нийслэлийн цагдаагийн удирдах газрын дарга Цогбаатар, дүүргийн Засаг дарга нарт үүрэг болголоо" гэсэн юм. 

Хязгаарлалтын үед төрийн байгууллагын ажилтнуудыг нэгдсэн унаагаар хүргэх бол хувийн байгууллага ажилчдынхаа 10-15 хувиас хэтрүүлэхгүйгээр ажиллуулах бөгөөд хувийн унаагаар хөдөлгөөнд оролцож болно гэдгийг Шадар сайд С.Амарсайхан өчигдөр мэдээлсэн.

Мөн энэ талаар УОК-ын хэвлэлийн төлөөлөгч Ц.Ганзориг  “Хатуу хөл хорионы хугацаанд үйл ажиллагаа нь хэвийн үргэлжлэх 14 салбарын дөрөв нь хувийн хэвшилд хамааралтай. Эдгээр байгууллага ажилчдынхаа 10-15 хувийн квот тогтоон, хувийн авто машинтайгаа хөдөлгөөнд оролцохыг зөвшөөрнө. Тухайн ажилтан ажлын газрын тодорхойлолт, ажлын үнэмлэх болон иргэний үнэмлэхтэйгээ явах ёстой. Гэхдээ хувийн машинтайгаа хөдөлгөөнд оролцохыг зөвшөөрөх ажилтны тоо нь байгууллагын нийт ажилтны 15 хувиас хэтэрч болохгүй” гэдгийг УОК-ын хуралдааны үеэр  мэдээлсэн юм.

Энэ үед хорио цээр хязгаарлалтын дэглэм тогтоосон үед үйл ажиллагаа нь зөвшөөрөгдсөн 14 байгууллагын ажилтан албан хаагчдын зорчих тээврийн хэрэгслийн хөдөлгөөн зохицуулалтыг хүргэж байна.