Архи согтууруулах ундааг удаан хугацаагаар хэрэглэх, хэтрүүлэн хэрэглэх нь хүний биед архины шалтгаант эрхтэн системийн бүхий л өвчлөлүүдийг үүсгэдэг аюултай.

Архи ходоод гэдсэнд нөлөөлөх нь:

Хүний ходоод бол хоол боловсруулах үүрэгтэй эрхтэн. Уусан архи амаар дамжин улаан хоолой, ходоод, 12 хуруу гэдэс, нарийн бүдүүн гэдэсний ханаар шимэгдэн цусанд орж цусны эргэлтээр дамжин хэдхэн минутын дотор бүх биеийн эд эсээр тархдаг. Архи нь амны хөндийн салст бүрхэвч, улаан хоолой, ходоодны салст бүрхэвчийг байнгын цочроосноор ходоодны улайлт, үрэвсэл үүсч, цаашдаа шархлан үүний улмаас ходоод гэдэсний архаг өвчин үүсгэдэг. Улмаар дараах шинж тэмдгүүд үүсдэг байна.

-Хоолонд дургүй болно
-Хоолны шингэц муудна
-Огиулна, бөөлжинө
-Витамин, тэжээлт бодисоор дутагдана.
-Тамир тэнхээгүй болно
-Арьс хуурайшина.
-Хурууны арьс сөрнө
-Үс унана.
-Улаан хоолой, ходоод, гэдэсний цус алдалт
-Хавдар

Архи элгэнд нөлөөлөх нь:

Архины нөлөөгөөр хамгийн их хордож гэмтдэг эрхтэн бол элэг юм. Элэг бол амин чухал эрхтэн бөгөөд идсэн уусан хортой бодис бүрийг хоргүйжүүлдэг.

Насанд хүрсэн хүний эрүүл элэг 1 цагт 10 гр цэвэр спирт /этанол/-ыг задлан хоргүйжүүлж, энэ нь биеэс 10-11 цагийн дараа гүйцэт задран гадагшилдаг.

Архины задаргаагаар үүссэн дутуу задралын бүтээгдэхүүн болох Ацетилальдегид нь биед маш их хортой ба энэ бодис ихээр хуримтлагдсанаас элгийг гэмтээнэ.

Ингээд архийг их хэмжээгээр, олон дахин хэрэглэснээс дараах шинж тэмдгүүд илэрнэ.



-Царай зүс харлана.
-Махан хоол идэж чадахгүй
-Өөх тостой хоол шингэхгүй
-Элэг өөхлөж томорно
-Элэг орчим хөндүүрлэнэ, унжирч өвдөнө
-Турж эцэж ядарна.
-Хамраас цус гарна.
-Бие загатнана.
-Өтгөн хатна
-Нүдний хараа муудна.
-Элэг хатуурал, элэгний хавдар

Нойр булчирхайд нөлөөлөх нь:

-Нойр булчирхайн хурц, архаг үрэвсэл
-Нойр булчирхайн үрэвсэл хавсарсан чихрийн шижин өвчин
-Тосоор гүйлгэх

Архи зүрхэнд нөлөөлөх нь:

Зүрх нь бүх эрхтэнийг цусаар хангадаг амин чухал эрхтэн юм. Архийг удаан хугацаагаар болон хэтрүүлэн хэрэглэсний улмаас зүрхний хэвийн үйл ажиллагаа алдагдаж эд эсэд бүтцийн эмгэг өөрчлөлтүүд бий болно.



-Зүрх өөхөлж зүрхний хэм алдагдах
-Зүрхний цохилт олшрох
-Зүрхний булчин чичрэх
-Зүрхний булчин үрэвсэх
-Артерийн даралт ихсэх
-Архи согтууруулах ундааг ихээр хэрэглэвэл хурц хордлогонд орсны улмаас зүрх судасны үйл ажиллагаа дарангуйлагдаж үхэлд хүргэж болно.

Архи бөөрөнд нөлөөлөх нь:

Архины нөлөөгөөр бөөрний эд эсүүд гэмтэж, хэвийн үйл ажиллагаа доголдоно. Эхний үед бөөр томорч, сүүлдээ хатингаршиж хэмжээгээр багасна.

Бөөрний үрэвсэл нь улмаар давсганд нөлөөлнө. Давсагны үрэвсэл нь түрүү булчирхайд нөлөөлснөөр түрүү булчирхай хэмжээгээр томорч, шээс хаагдах хүртэл аюултай хүндрэл өгдөг.

Хэрвээ та эрүүл мэнддээ хайртай бол архийг байнга хэтрүүлэн хэрэглэхээс зайлшгүй, яаралтай татгалзах хэрэгтэй гэдгийг танд сануулъя.