ЭМЯ-наас коронавирусийн халдварын асуудлаар мэдээлэл хийж байна.

ШУУД:

ЭМЯ-ны газрын дарга Д.Нарангэрэл:

Дэлхий дахинд коронавирусийн халдвар 216 улсад бүртгэгдэж, 5.7 сая хүн өвчилж, 356 мянган хүн нас бараад байна. Сүүлийн 24 цагийн хугацаанд 101 мянган тохиолдол илэрч, нас баралт 5000-ааар нэмэгдэв. Өвчлөл, нас баралт өмнөх өдрөөс нэмэгдсэн үзүүлэлттэй байна. ОХУ-д 24 цагийн дотор 8338 хүн халдвар авсан байна. 

Манай улсын хувьд 383 хүн шинээр ажиглалтад орж, хоёр хүн тусгаарлах байрнаас гарч гэрийн тусгаарлалтад шилжлээ. Одоогийн байдлаар 1,635 хүн ажиглалтад байгаа. ЗӨСҮТ-ийн халдваргүйжүүлэх баг өчигдөр 186 ачаа, гурван зочид буудал, 11 галт тэргэнд эцсийн халдваргүйжүүлэлт хийлээ. Сүүлийн 24 цагийн 119 тоот дугаарт 228 хэрэглэгч хандаж, мэдээлэл зөвлөгөө авсан. Шуурхай аппликейшнд гадаад улсад байгаа 15 иргэн хандаж зөвлөгөө авсан.

ЗУРГААДУГААР САРЫН 1-НЭЭС МОСКВА ХОТОД МӨРДӨГДӨЖ БУЙ ХЯЗГААРЛАЛТЫГ ҮЕ ШАТТАЙГААР ЦУЦАЛНА

ЭМЯ-ны Гадаад харилцааны хэлтсийн дарга Б.Янжмаа:

АНУ-д өчигдөр 16 мянган шинэ тохиолдол илэрч, 770 нас баралт бүртгэгдлээ. Халдварын тохиолдлын тоогоор Бразил 2-т жагсаж байна. Өнгөрсөн 24 цагийн хугацаанд тус улсад 20,599 шинэ тохиолдол бүртгэгдэж, нийт батлагдсан тохиолдлын тоо 411 мянгыг даваад байна. Үүнээс эдгэрсэн хүний тоо 166 гаруй болсон бол идэвхтэй халдвартай хүний тоо одоогоор 219 мянга орчим байгаа юм.

ОХУ-ын хувьд өмнөх өдрүүдийн нэгэн адил тогтвортойгоор халдварын тоо нэмэгдэж, 8,000 гаруй шинэ халдвар бүртгэгджээ. Ингээд тус улсын нийт халдвар авсан хүний тоо 370,600 гаруй болсон байна. ОХУ-д COVID-19 халдвар оргил үедээ хүрсэн хэмээн үзэж байгаа тул зургаадугаар сарын 1-нээс эхлэн Москва хотод мөрдөгдөж буй хязгаарлалтын арга хэмжээнүүдийг үе шаттайгаар цуцалхаар болжээ.

ХӨСҮТ-ийн захирал Д.Нямхүү: 

Тавдугаар сарын 27-ны өдөр дөрвөн лабораторид нийт 517 хүний сорьцод шинжилгээ хийлээ. Үүнээс 504 хүний шинжилгээнд коронавирус илрээгүй. Шинжилгээний дүнг задалж танилцуулбал, ХӨСҮТ-д тусгаарлагдсан 40, ажиглах байранд байгаа 352, тандалтын зорилгоор цуглуулсан 19, ажиглах байранд тусгаарлагдсан 7 хүний давтан шинжилгээнд коронавирус илрээгүй. Дархан-Уул аймгийн вируслогийн лабораторид Алтанбулгийн боомтоор орж ирсэн 30 жолооч, аймгийн ажиглалтын байранд тусгаарлагдсан 69 хүний давтан шинжилгээнд коронавирус илрээгүй.

Оюутнууд маань маш их халдвар авсан нь харагдаж байна.

Харин 13 хүний шинжилгээнээс коронавирус илэрсэн. Тодруулбал, тавдугаар сарын 26-нд Москва-Улаанбаатар чиглэлийн онгоцоор 170 хүн ирсэн. Эндээс давтан шинжилгээ хийхэд нэг оюутнаас коронавирус илэрсэн. Мөн тавдугаар сарын 27-нд Алтанбулгийн боомтоор орж ирсэн 340 хүний 12-оос нь коронавирус илэрсэн. Тэдний 10 нь оюутан. 

Оюутнууд маань маш их халдвар авсан нь харагдаж байна. Хүний нутагт голдуу нэгдүгээр курсийн 17-20 насны хүүхдүүд байгаа. Сургуулийн үйл ажиллагаа зогсоод, бөөгнөрлийг сааруулах зорилгоор дотуур байрнаасаа гарсан нөхцөлд хүүхдүүд байсан. Тэд олон бэрхшээлийг давж эх орондоо ирсэн. ОХУ-аас ирсэн хүмүүсийн дийлэнх нь оюутнууд юм. Бид байгаа онож хүнээ зөв сонгож татаж авсан гэж үзэж байгаа. Хүүхдүүдээ эцэг эх, ах дүү нарынх нь дэргэд, эх оронд нь эмчилж байгаа нь маш сайхан хэрэг боллоо.

ТУСГААРЛАГДАЖ БАЙГАА ИРГЭД МАШ УХАМСАРТАЙ БАЙЖ, МЭДЭЭЛЛЭЭ НАРИЙН ТОДОРХОЙ ӨГЧ БАЙГАА

Өнөөдрийн байдлаар нийт батлагдсан тохиолдол 161 боллоо. Эдгэрсэн 43, эмчлэгдэж байгаа 118 хүн байна. Биеийн байдлыг үнэлбэл хөнгөн 107, хүндэвтэр 11 хүн байна. ХӨСҮТ-д өнөөдрийн байдлаар 165 хүн байгаа бөгөөд бид 250 хүн хүлээж авч ажиллах боломжтой.  

Өнөөдөр өглөө 07:40-д Алтанбулаг боомтоор орж ирсэн 230 зорчигчийг гал тэргээр Улаанбаатар авчирлаа. Үүнээс 21-г нь сэжигтэй гэж үзэн ХӨСҮТ-д тусгаарласан. Тусгаарлагдаж байгаа иргэд маш ухамсартай байж, мэдээллээ нарийн тодорхой өгч байгаа. Сэтгэл өндөр байна. Явцын дунд шинж тэмдэг илрээгүй ч  чухал мэдээллүүдийг санаачилж өгч байгаа учраас хамтарч ажиллахад бидэнд урамтай байгаа. Цаашдаа чартер нислэгээр ирэх бүх иргэдээ маш сайн хянана. Бүх юм хяналтад байгаа гэдгийг хэлмээр байна.