АНУ-ын Калифорни мужид гарсан ойн түймэр хурдацтай тархаж, Лос Анжелес хот руу орсон.

Одоогийн байдлаар түймрийн улмаас 5 хүн амиа алдаж, 150 мянга гаруй иргэнийг нүүлгэн шилжүүлээд буй.

Тус хотын түүхэнд гарсан хамгийн өндөр хохиролтой түймэр болж байгааг эрх баригчид хэлж байна. Одоогоор 1000 гаруй байгууламж шатсан, 300 мянга гаруй өрх, байгууллагууд цахилгаангүй болсон.
Түүнчлэн Лос Анжелес дахь Холливүүдийн оддын байшин шатаж, сүйдсэн хэмээн мэдээлж байна. Тухайлбал Парис Хилтон Малибу дахь гэр нь шатаж байгааг телевизийн шууд дамжуулалтаар мэдсэн гэв.

Түймрийн шалтгааныг тогтоохоор холбогдох албаныхан ажиллаж байгаа юм.

Лос Анжелес болон ойролцоох бүс нутгийн таван газарт түймэртэй байна. Түймрийн хамгийн том голомт нь Палисэдс хотод байгаа бөгөөд 69.6 км.кв талбай галд өртөөд байна. 
Түймрийн улмаас Ерөнхийлөгч Жо Байден бүрэн эрхийнхээ хүрээнд хийх сүүлчийн айлчлалаа цуцалсан. Тэрбээр Итали руу төрийн айлчлал хийх хуваарьтай байсан юм. 

Эх сурвалж: CNN