Монгол Улсын гавьяат нисгэгч цолоор шагнуулсан МИАТ компанийн БОИНГ-737800 онгоцны багш нисгэгч Д.Оюунболдтой уулзлаа.

Та аль нутгийн хүн бэ. Иргэний нисэхийн салбарт хэдэн жил ажиллаж байна?
-Уугуул нутаг минь Дорнод аймгийн Булган сум. Монголын иргэний агаарын тээврийн орон нутаг болон олон улсын нислэгт тасралтгүй 39 жил ажиллаж байна.

Өнөөдөр Ерөнхийлөгчийн зарлигаар Монгол Улсын гавьяат нисгэгч хэмээх хүндэтгэлтэй цолоор шагнууллаа. МИАТ компанийн хамт олон, иргэний нисэхийнхээ, Дорнодчууддаа гарч буй гал тахиа жилийн мэндийг хүргэе.

-Та 39 жилд ямар цаг хугацааг агаарт хэчнээн км замыг туулав?
-1978 онд ЗХУ-д Нисгэгчийн сургууль төгсөж ирээд, Дорнод аймгаас ажлын гараагаа эхэлсэн. АН-2 онгоцны хоёрдугаар нисгэгчээс Airbus-310 онгоцны дарга, багш нисгэгч, БОИНГ-737800 онгоцны багш нисгэгчээр ажиллахдаа таван төрлийн онгоцоор агаарт 22500 цаг ниссэн байдаг.

-Та багш нисгэгч гэхээр шинэ нисгэгчдийг бэлтгэсэн юм байна?
-Тийм ээ. Нислэг үйлдэхээс гадна залуу нисгэгчийг сургаж, дадлагажуулах үүргийг сүүлийн 10-аад жил давхар гүйцэтгэж ирлээ.