- АНУ-ын Нью-Йорк хотод төвтэй НҮБ-аас мэдээллийг бэлтгэн хүргэж байна -

АНУ-ын Ерөнхийлөгч Жо Байден НҮБ-ын Аюулгүйн Зөвлөлийн бүрэлдэхүүнд өөрчлөлт оруулах асуудлыг хөндөхөөр төлөвлөж байна гэж Цагаан ордноос мэдээллээ. Байден НҮБ-ын Аюулгүйн Зөвлөлийн байнгын гишүүний бүрэлдэхүүнд ХБНГУ, Энэтхэг, Бразил, Япон зэрэг 5-6 улсыг шинээр нэмэхийг санал болгох гэж байгаа аж.

Цагаан ордны стратегийн харилцааны зохицуулагч Жон Кирби The Telegraph сонинд өгсөн ярилцлагадаа "Ерөнхийлөгч Байден энэ асуудлыг дэлгэрэнгүй хөндөж ярих болно. Аюулгүйн зөвлөлийн бүтцийн асуудлыг хөндөх цаг нь болсон гэдэгт бид итгэлтэй байгаагаа тодорхой хэлсэн” гэв.

Америкийн эрх баригчдын үзэж байгаагаар НҮБ-ын Аюулгүйн зөвлөл "илүү хүртээмжтэй, иж бүрэн байх ёстой" гэж Кирби нэмж хэлэв.

Хэрэв Жо Байдены санал дэмжигдвэл НҮБ-ын Аюулгүйн зөвлөл 1945 онд байгуулагдсан цагаасаа хойш анх удаа ийм томоохон хэмжээний шинэчлэлийг үзэх юм.

Аюулгүйн зөвлөл бол НҮБ-ын гол байгууллага юм. Дүрмийн дагуу, тус зөвлөл нь олон улсын энх тайван, аюулгүй байдлыг сахин хамгаалах үүрэгтэй. Аюулгүйн зөвлөлийн бүрэлдэхүүнд 15 улс багтдаг бөгөөд БНХАУ, ОХУ, Их Британи, АНУ болон Франц гэсэн байнгын таван гишүүнтэй. 

Мөн байнгын бус 10 гишүүн улс юм. Байнгын бус 10 орныг НҮБ-ын Дүрмийн дагуу НҮБ-ын Ерөнхий Ассамблейгаас хоёр жилийн хугацаатай таван жил бүр сонгодог байна. Гишүүн улсууд англи хэлний цагаан толгойн үсгийн дарааллаар буюу нэрсийн дарааллаараа Аюулгүйн зөвлөлийг нэг сарын хугацаатайгаар ээлжлэн даргалдаг юм.