Өчигдөр Apple компани шинэ бүтээгдэхүүн болох iPhone 6 болон iPhone 6 Plus-аа танилцууллаа.

Үндсэн өөрчлөлт

Шинээр гарсан хоёр загварын гол ялгаа нь дэлгэцийн хэмжээ байлаа. iPhone 6 нь 4.7 инч буюу 4 инчийн дэлгэц бүхий iPhone 5S-ээс бага зэрэг том юм. Харин iPhone 6 Plus нь 5.5 инчийн дэлгэцийн хэмжээтэй байгаа нь “фаблет” (утас таблетын хослол) сонирхогчдын сонголтод илүүтэй нийцэхээр байна.

Үнэ

АНУ-д iPhone 6-гийн 16GB багтаамжтай нь 649 ам.доллар, 64GB багтаамжтай нь 749 ам.доллар, 128GB багтаамжтай нь 849 ам.доллараар худалдаалагдах бол iPhone Plus-ийн 16GB багтаамжтай нь 749 ам.доллар, 64GB багтаамжтай нь 849 ам.доллар, 128GB багтаамжтай нь 949 ам.доллараар хэрэглэгчдэд санал болгогдож байна.

Борлуулалтын нээлт

iPhone 6, iPhone 6 Plus-ийг есдүгээр сарын 19-нд АНУ, Австрали, Канад, Франц, Герман, Гонконг, Япон, Портэ Рико, Сингапур, Их Британид худалдаалж эхлэх нь. Урд жил iPhone 5S-ийн нээлтийг дээрх улсуудаас гадна Хятадад мөн хийж байсан билээ. Apple-ийн хэлж байгаагаар iPhone 6 болон iPhone 6 Plus-ийг 115 оронд ирэх оноос өмнө борлуулах юм байна.

Баттерейний хугацаа

iPhone-уудын сүүлийн загвар дэлгэцээс гадна баттерейний чадлаа нэмжээ. Apple-ийн хэлж байгаагаар iPhone 5S нь идэвхитэй сүлжээнд баттерейгаа 10 цаг барьдаг байсан бол iPhone 6 нь 11 цаг, iPhone 6 Plus нь 12 цаг ажиллах боломжтой болсон байна.

Утасны жин

iPhone 6 утасны жин 5C загвартай бараг ижил боловч 5S загвараас арай хүнд байх нь. iPhone 6 Plus нь одоогийн байдлаар хамгийн хүнд iPhone буюу 340 орчим граммын жинтэй байна.

Том дэлгэцний ач тус

iPhone том дэлгэц бүхий загвараа танилцуулснаар илүү өндөр нарийвчлалаар видео бичлэг үзэх боломжоор хангаж байгаа Samsung Galaxy Note болон бусад  фаблет хэрэглэгчдийн сонирхлыг татахаар байна. Apple бүтээгдэхүүн танилцуулгын үеэр Messages, CNN зэрэг аппликэйшнүүдийг iPhone 6 Plus дэлгэц дээр үзүүлж сонирхуулж байлаа.

Шинэ видео бичлэг хийх боломж

iPhone 5S-д удаан бичлэгийн боломж буюу секундэд 120 кадр авах боломжтой байсан билээ. Харин iPhone 6 энэ үзүүлэлтийг 2 дахин нэмж секундэд 240 кадр бичлэг авах боломжтой болсон байна. Мөн түүнчлэн дараалласан фокус бүхий 60 кадр нэгж секундэд гаргах HD видео авах функц нэмэгдэж орсон байна.

Шинэ Apple Watch

Apple шинээр Apple Watch хэмээх бүтээгдэхүүнийхээ танилцуулгыг мөн хийлээ. Уг төхөөрөмжийн тусламжтай Siri болон Газрын зургийг улам л хялбар ашигладаг болох нь. Спортлог хүмүүст зориулж уг цаг нь биеийн хөдөлгөөн, дасгалын явцыг хянах боломжийг мөн олгож байна.

Apple Watch-ийг iPhone 5 болон түүнээс хойшхи хувилбаруудтай хослуулан хэрэглэх боломжтой. Уг бүтээгдэхүүн нь Apple Watch Apple Watch Sport, Apple Watch Edition гэсэн гурван төрлөөр 2015 оны эхээр борлуулагдаж эхлэх бөгөөд үнэ нь ойролцоогоор 349 ам.доллараас эхлэх төлөвтэй байна.

Apple-ийн шинэ төлбөрийн систем

АНУ-д iPhone 6, 6 Plus, Apple Watch бүтээгдэхүүнүүд Apple Pay төлбөрийн системтэй холбогдож ажиллах бөгөөд 220,000 дэлгүүр, үйлчилгээний газруудад уг системийг нэвтрүүлсэн байна. Эдгээрийн дунд McDonald’s, Whole Foods, Walgreens зэрэг том сүлжээнүүд аль хэдийн багтжээ. Apple компани Visa, MasterCard болон American Express мөн томоохон банкууд болох Chase, Citibank-тай хамтран ажиллаж байна.

iOS 8

Шинэ iPhone-ийн хувилбарууд iOS 8 буюу хамгийн сүүлийн Apple-ийн үйлдлийн системтэй гарч байна. Уг хувилбарт шинэ мессежний боломж, гарын товчлуурын зохион байгуулалт, iCloud хадгалах сан, Apple-ийн эрүүл мэндийн аппликэйшнийг санал болгосон байна.

Apple компани шинэ бүтээгдэхүүнүүдийнхээ нээлтийг Күпертино, Калифорнид хийсэн бөгөөд дэлхий даяар AppleLive ашиглан интернэтээр шууд цацлаа. Гэвч AppleLive-ийн шууд дамжуулалтын үеэр байнга алдаа гарч үзэхэд хүндрэл үүсгэж байгаа талаар Твиттерчид жиргэж байсан нь нэр хүндтэй компанийн хувьд байж боломгүй алдаа байлаа.