2022 оны дөрөвдүгээр сар чөлөөт бөхийн Азийн аварга шалгаруулах тэмцээн, PUBG Mobile-н Зүүн Азийн мэргэжлийн лигийн аварга зэрэг онцлох үйл явдлуудаар дүүрэн өнгөрлөө.

Тэгвэл спорт сонирхогчдыг 2022 оны тавдугаар сард ямар онцлох тэмцээн уралдаан, үйл явдлууд хүлээж байгааг танилцуулъя.

ҮНДЭСНИЙ БӨХ

2022.05.07. Үндэсний бөхийн холбооноос тавдугаар сард Монгол бөхийн өргөөнд 9 барилдаан зохиохоор төлөвлөжээ.

1. Тавдугаар сарын 07-нд Өвөрхангай аймгийн Баян-Өндөр сумын харьяат, Монгол Улсын гавьяат дасгалжуулагч, улсын арслан Бандийн Ганбаатарын нэрэмжит, гэр бүлийн үүсгэн байгуулсан “Монгол зодог” ХХК-ийн 20 жилийн ойд зориулсан улс аймгийн алдар цолтой 256 бөхийн барилдаан,
2. Тавдугаар сарын 08-нд Булган аймгийн Тэшиг сумын аймгийн хурц, бадрангуй, хичээлт, итгэлт, ерөөлт арслан Нямын Батчулууны нэрэмжит АЦЦБЗалуу 256 бөхийн барилдаан,
3. Тавдугаар сарын 13-нд Монголын зүүний хүчний холбооны 15 жилийн ойд зориулсан улс, аймгийн алдар цолтой 128 бөхийн барилдаан,
4. Тавдугаар сарын 14-нд “Чойрын богд хайрханы хишиг” АЦЦБЗалуу 256 бөхийн барилдаан,
5. Тавдугаар сарын 15-нд “Алтанжолоо” группийн нэрэмжит “Улсын арслан цолны хүндэтгэл”-ийн улс, аймгийн алдар цолтой 256 бөхийн барилдаан,
6. Тавдугаар сарын 20-нд Нийтийн монгол шандастай, өсвөр бөхийн ээлжит барилдаан,
7. Тавдугаар сарын 21-нд сумын цолтон болон залуу бөхчүүдийн ээлжит барилдаан,
8. Тавдугаар сарын 22-нд “Бахдам гарамгай” багийн халз барилдаан,
9. Тавдугаар сарын 28-нд Нисэх хүчний өдөрт зориулсан “Улсын аварга цолны хүндэтгэл”-ийн улс, аймгийн алдар цолтой 256 бөхийн барилдаан тус тус болно.

СҮМО

2022.05.08. Сүмо бөхийн тавдугаар сарын тэмцээн буюу Нацү башё тавдугаар сарын 8-нд эхэлж 15 хоног үргэлжилнэ.

Өнгөрсөн гуравдугаар сарын Харү башёг бэртлийн улмаас өнжөөд байсан ёкозүна Терүнофүжи Г.Ган-Эрдэнэ зүүний манлайд барилдах бол барууны манлайд озеки Шодай гарчээ.

Харин Харү башёд түрүүлсэн Ватакакаге секиваке цолтойгоор барилдахаар болсон байна.

БОКС

2022.05.08-20 Сонирхогчийн боксын эмэгтэйчүүдийн дэлхийн аварга шалгаруулах тэмцээн Турк улсын Истанбул хотод тавдугаар сарын 8-нд эхэлнэ.

Олон Улсын боксын холбооноос зохиож буй уг тэмцээнд дэлхийн 84 орны 394 тамирчин оролцохоор бүртгүүлээд байна.

ХОЛИМОГ ТУЛААН

2022.05.08. Холимог тулааны дэлхийн шилдэг холбоо UFC-ийн Lightweight буюу хөнгөн жингийн аваргын бүсийн төлөөх тулаан Чарлес Оливейра, Жастин Гейджи нарын хооронд болно.

Тулаан "UFC 274"-ийн үеэр болох бөгөөд эмэгтэйчүүдийн strawweight жингийн  аваргын бүсийн төлөө Карла Эспарза, Рөүз Намаюнас нарын тулаан хоёр дахь оргил тулаан нь байх юм.

CSGO MAJOR

2022.05.09. И-спортын хамгийн том төлөөллүүдийн нэг CS:GO (Counter-Strike: Global Offensive) тоглоомын дэлхийн аварга шалгаруулах тэмцээн гэж болохуйц хамгийн нэр хүндтэй, хамгийн өндөр шагналтай "Major Championship" тавдугаар сарын 9-нд эхэлнэ.

"PGL Major Antwerp 2022" нэрээр зохиогдож буй дэлхийн аваргын төлөөх тэмцээн Бельгийн Антверп хотноо тавдугаар сарын 22-ыг хүртэл үргэлжилнэ. Тэмцээний The Challengers Stage шатанд Монгол Улсын төлөөлөл "Team IHC" оролцохоор шалгарсан ба эхний тоглолтоо Major-н дөрвөн удаагийн аварга Данийн "Astralis" багтай хийнэ.

"PGL Major Antwerp 2022" тэмцээн гурван үе шаттай. Эхний шат буюу "The Challengers Stage"-д 16 баг швейцар системээр тоглож шилдэг 8 нь "The Legends Stage" шатанд шалгарна.

Хоёрдугаар шатанд аль хэдийн шалгараад байсан найман багийн хамт нийт 16 баг мөн швейцар системээр тоглож шилдэг 8 нь "The Champions Stage" шатанд шалгарах юм.

FORMULA 1

2022.05.07-9. Formula 1-ийн 72 дахь улирлын тав дахь гараа буюу Майамигийн Гран-При тэмцээн Флорида муж дахь "Miami International Autodrome" зам дээр болно. Нисгэгчид 5.41 км урттай замыг 57 удаа тойрох учиртай.

Энэ нь тус зам дээр зохиож буй анхны Гран-При бөгөөд 2022 оны улиралд АНУ-д болж буй хоёр гарааны тэмцээний эхнийх нь юм.

2022.05.20-22. Formula 1-ийн 72 дахь улирлын зургаа дахь гараа буюу Испанийн Гран-При тэмцээн Каталоны Монмело дахь "Circuit de Barcelona-Catalunya" зам дээр болно. Нисгэгчид 4.675 км урттай замыг 66 удаа тойрох учиртай.

2021 оны тус гараанд "Mercedes" багийн Льюис Хэмилтон түрүүлж "Red Bull" багийн Макс Ферстаппэн аман хүзүүдэж байв.

2022.05.27-29. Formula 1-ийн 72 дахь улирлын долоо дахь гараа буюу Монакогийн Гран-При тэмцээн Монакогийн Монте Карлогийн гудамд байрлах "Circuit de Monaco" зам дээр болно. Нисгэгчид 3.337 км урттай замыг 78 удаа тойрох учиртай.

2021 оны тус гараанд "Red Bull" багийн Макс Ферстаппэн түрүүлж "Ferrari" багийн Карлос Сайнз аман хүзүүдэж байв.

ХОККЕЙ

2022.05.13. Мөсний хоккейн дэлхийн аварга шалгаруулах тэмцээн Финланд улсад тавдугаар сарын 13-нд эхэлнэ. Тэмцээн Хельсинки болон Тампере хотуудад болох бөгөөд 16 улсын шигшээ баг оролцоно.

Канад, Чех, Дани, Герман, Их Британи, Итали, Казахстан, Латви, Норвеги, Словак, Швед, Швейцар, АНУ-ын багаас гадна Орос, Беларусийн оронд Австри, Францын шигшээ баг оролцох юм.

ФУТЗАЛ

2022.05.17-21. Азийн хөл бөмбөгийн холбооны “Футзалын Азийн Цом”-ын тэмцээн 2022 оны есдүгээр сард Кувейт улсад болно. Тус тэмцээн оролцох эрхийн төлөө Зүүн Азийн бүсэд таван улс тоглохын нэг нь Монголын шигшээ баг юм.

Малайз улсад болох тэмцээнд Япон, Тайвань, БНСУ, Хонконг болон Монголын шигшээ багууд тойргоор тоглож хамгийн өндөр оноо авсан гурван баг нь Азийн цомд оролцоно.

ГОЛЬФ

2022.05.19-22. Мэргэжлийн гольфын дөрвөн том тэмцээний (Majors) нэг 104 дэх удаагийн "PGA Championship" тэмцээн тавдугаар сарын 19-д эхэлнэ. Америкийн мэргэжлийн гольфчдын холбоо буюу PGA нь 1916 оноос тус тэмцээнийг зохиож эхэлсэн бөгөөд 2018 онд 100 дахь тэмцээнээ зохиосон.

АНУ-ын Оклахома мужийн Талса хотод болох 2022 оны тэмцээний шагналын сан 12 сая ам.доллар дөрвөн major-т түрүүлж байсан аваргууд тэргүүтэй 156 тамирчин оролцохоор бүртгүүлжээ.

ТЕННИС

2022.05.22-06.05. Талбайн теннисийн дөрвөн их дуулгын нэг 126 дахь удаагийн Францын нээлттэй тэмцээн буюу "Roland-Garros" тавдугаар сарын 22-нд эхэлнэ.

Шороон талбайд болдгоороо онцлог 2021 оны Roland-Garros-н эрэгтэй төрөлд Сербийн Новак Жокович, эмэгтэй төрөлд Чехийн Барбора Кречикова түрүүлсэн.

Испанийн Рафаэл Надаль тус тэмцээнд хамгийн олон удаа буюу 13 удаа түрүүлсэн амжилттай. Тэмцээний ганцаарчилсан төрөл тус бүрт 128 тамирчин оролцоно.

УЛААНБААТАР МАРАФОН 2022

2022.05.28. Нийслэлийн биеийн тамир спортын газар, Нийслэлийн засаг даргын тамгын газар, Монголыг хэт холын марафон гүйлтийн холбоо хамтран "Улаанбаатар марафон 2022" олон улсын тэмцээнийг тавдугаар сарын 28-нд зохионо.

Марафоны бүртгэл дөрөвдүгээр сарын 14-нд эхэлсэн бөгөөд тавдугаар сарын 20-н хүртэл үргэлжилнэ.

5 км, 1.5 км гүйлтийн бүртгэлийг дүүргүүдийн спорт хороо хийх бол 10 км, 21 км, 42 км гүйлтийн бүртгэлийг Монголын хэт холын марафон гүйлтийн хорооноос зохион байгуулна. Бүртгэх холбоос

АВАРГУУДЫН ЛИГИЙН ФИНАЛ

2022.05.29. UEFA-ийн Аваргуудын лигийн финалын тоглолт тавдугаар сарын 29-д Францын Сент-Денис хотын "Stade de France" цэнгэлдэх хүрээлэнд болно.

Харин "Europa League"-н финал тавдугаар сарын 19, "European Conference League"-н финал тавдугаар сарын 26-д болно.

3Х3 САГСАН БӨМБӨГ

2022.05.28-29. FIBA 3х3 сагсан бөмбөгийн эмэгтэйчүүдийн дэлхийн цуврал тэмцээн Израилын Тель Авив хотод тавдугаар сарын 28-нд эхэлнэ. Харин эрэгтэйчүүдийн цуврал Филиппиний Манилад эхэлнэ.

NBA PLAYOFFS

2022.04.16-06.19. NBA-ийн "Playoffs" шатны тоглолтууд дөрөвдүгээр сарын 16-наас зургаадугаар сарын 19 хүртэл үргэлжилнэ.

PUBG MOBILE

2022.05.19-22. PUBG Mobile-ын мэргэжлийн лигийн Өмнөд Азийн аварга шалгаруулах хаврын тэмцээн буюу "PUBG Mobile Pro League - South Asia Championship Spring 2022" тавдугаар сард болно.

Тэмцээнд PUBG Mobile-ын мэргэжлийн лигийн Өмнөд Азийн лигийн эхний 10 байрын шагналт багууд болон Пакистаны лигийн шилдэг зургаан баг оролцоно.

Монгол Улсын төлөөлөл "Stalwart Esports", "IHC Esports", "Seal Esports" багууд оролцох эрхээ авсан ба Бангладеш, Балба, Пакистаны шилдэг багуудтай тоглоно.