Хатагтай А.Меркел Монгол Улсад айлчилсан сайхан сэтгэгдэл одоо ч саяхных мэт санагдаж байна гээд дахин уулзаж байгаадаа баяртай байгаагаа илэрхийлэв. Ерөнхийлөгч Ц.Элбэгдоржийн энэхүү айлчлал манай хоёр орны иж бүрэн түншлэлийн харилцааг амжилттай хөгжүүлэхэд чухал түлхэц болно гэдэгт итгэж байна гэж тэрээр хэллээ.

Ерөнхийлөгч Ц.Элбэгдорж халуун дотноор хүндэтгэн хүлээн авч байгаа Германы засгийн газар, ард түмэнд талархал илэрхийлэв. Тэрээр Монгол Германы харилцааг эрчимжүүлэхэд онцгой анхаарал тавин ажиллаж байгаагаа тэмдэглэлээ.

“Танай улстай  худалдаа эдийн засгийн хамтын ажиллагааг өргөжүүлэхийг бид хүсч байна. Канцлер таны айлчлалын үеэр зурагдсан “Ашигт малтмал, аж үйлдвэр болон технологийн салбарт хамтран ажиллах тухай хэлэлцээр”-ийн дагуу ажлын хэсэг байгуулагдан ажиллаж байгаа. Цаашдаа хоёр тал ашигт малтмалын хайгуул, олборлолт, боловсруулалт, дэд бүтэц, хууль эрхзүй, байгаль орчин болон мэргэжилтэй боловсон хүчин бэлтгэх чиглэлээр хамтран ажиллах болж байгаад бид сэтгэл хангалуун байна” гэж Ерөнхийлөгч Ц.Элбэгдорж ярив.

Тэрээр, монголын говьд нарны эрчим хүчийг ашиглах Gobitec төслийг хэрэгжүүлэх, Германы хөнгөлттэй зээлээр орон сууц, дэд бүтцийн томоохон төслүүдийг санхүүжүүлэх, газрын ховор элементийн чиглэлээр нарийвчилсан судалгаа хийх хүрээлэн байгуулах зэрэг асуудлуудад дэмжлэг үзүүлэхийг Германы талаас хүслээ.

Хатагтай А.Меркел, Германы Засгийн газар анх удаа Монгол Улстай ашигт малтмалын салбарт хамтран ажиллах хэлэлцээр байгуулсныг онцолж энэхүү хэлэлцээрийг ажил хэрэг болгох саналуудыг дэмжихээ илэрхийлэв. Тухайлбал нүүрснээс шингэрүүлсэн түлш гаргах үйлдвэр барих төсөл, германы уул уурхайн стандартыг Монголд нэвтрүүлэх, сэргээгдэх эрчим хүчний томоохон төслүүдийг хамтран хэрэгжүүлэх, шинжлэх ухааны парк барих зэрэг асуудлуудаар ярилцаж санал солилцов.

Ерөнхийлөгч Ц.Элбэгдорж монгол судлалыг дэмжих тусгай сан санаачилж байгуулснаа хэлээд, боловсролын салбарын харилцааг эрчимжүүлэх, ялангуяа герман дахь монгол судлалыг дэмжих, археологи, түүхийн судалгааны ажлуудыг үргэлжлүүлэх, хамтарсан их сургууль байгуулах талаар тодорхой асуудлуудыг хөндөв.

Тухайлбал Монгол Германы тэтгэлэгт хөтөлбөрийг хэрэгжүүлэх хэлэлцээрийн дагуу нийт 30 гаруй оюутан суралцаж байгаа. Энэхүү хөтөлбөрийг цаашид үргэлжлүүлэх хүсэлтэй байна гэдгээ Ерөнхийлөгч Ц.Элбэгдорж илэрхийлсэн. Мөн Бонны Их сургуулийн Монгол судлалын тэнхимийн монгол судлаач профессор багшийг санхүүжүүлэхэд бэлэн байна гэв.

Энэ уулзалтын мөн үеэр хөдөө аж ахуй, төмөр замын чиглэлээр хамтран ажиллах боломжуудын талаар ярилцаж, харилцан санал солилцсон.

Дараа нь ХБНГУ-ын канцлер А.Меркел Монгол Улсын Ерөнхийлөгчийг хүндэтгэн зоог барив.



Ангела Меркел: Эртний андтайгаа уулзахад үргэлж дотно байдаг

Хатагтай А.Меркел ярихдаа “Монгол Улсын Ерөнхийлөгч Цахиагийн Элбэгдорж Герман Улсад төрийн айлчлал хийхээр хүрэлцэн ирснийг хүндэтгэж байна. Эрхэм Ерөнхийлөгч таныг манай оронд тавтай морилохыг хүсье. Ерөнхийлөгч Ц.Элбэгдорж бид хоёр өмнө нь уулзаж байсан хуучны танилууд. Энэ удаагийн төрийн айлчлал нь хамтын ажиллагааны хүрээнд яригдаж буй чухал асуудлуудыг ажил хэрэг болгоход чухал түлхэц болно гэдэгт эргэлзэхгүй байна.  

Монгол Улс ардчиллыг тогтоож бэхжүүлж байгаагаа нэгэн чухал үйл явдлаар баталгаажууллаа. Энэ бол тус улс Ерөнхийлөгч Ц.Элбэгдоржийн санаачилгаар цаазаар авах ялыг халсан явдал юм.

Герман Монголын харилцаа хамтын ажиллагаа улам бүр бэхжиж байгаад би сэтгэл хангалуун байна. Өнгөрсөн жил миний айлчлалын үеэр Герман Улс анх удаа Монгол Улстай Ашигт малтмал, аж үйлдвэр болон технологийн салбарт хамтран ажиллах тухай хоёр улсын засгийн газар хоорондын хэлэлцээр байгуулсан нь хоёр орны харилцааг өргөжүүлэхэд өндөр ач холбогдолтой юм.

Монгол Улсын Ерөнхийлөгч энэхүү айлчлалынхаа үеэр Хамбург, Дюсселдорф хотуудад зочилж манай улсын аж үйлдвэрийн томоохон төслүүдтэй танилцаж байгаа нь дээрхи хэлэлцээрийг хэрэгжүүлэх бодит эхлэх болж байна гэж үзэж байна. Бид боловсрол, шинжлэх ухаан тэр дотроо түүх археологи хэл шинжлэлийн чиглэлээр хамтын ажиллагаагаа улам эрчимжүүлэх, боловсон хүчний нөөцөө ашиглах хэрэгтэй гэдэг дээр санал нэгдлээ.