Цагдаагийн Ерөнхий Газрын дарга Т.Сүхболд "NTV" телевизийн “Лхагвын тойм” нэвтрүүлэгт оролцохдоо юу ярьсан бэ?

-Өөрчлөлт, шинэчлэл хийе гэхээр хүн дургүйцдэг болчихдог юм билээ. Байгаа газраа дасчихдаг. Бид ярилцаж байгаад ажил хийдэггүй тамирчин, ажил хийдэггүй хэр нь цалин авдаг дуучин хэрэггүй юм байна гэж шийдсэн.

Одоо “Сүлд” чуулга гэж дангаараа байхгүй. Урьдчилан сэргийлэх албаны харьяанд иргэд рүү чиглэсэн соён гэгээрүүлэх хэлтэс болсон. 2024 оны гуравдугаар сард тушаал гаргаад ажил хийдэггүй тамирчин, “Сүлд” чуулгын нэр дээр явдаг дуучдыг бүгдийг чөлөөлсөн.
 
“Хүч” спорт хороог сургалтын төв рүү нэгтгээд алба хаагчдын бие бялдрыг хөгжүүлэх чиглэлээр сургалт явуулдаг байгууллага болгосон.
 
Өмнө нь улсын шигшээ багийн тамирчин хүн багаасаа цалин авдаг. Тэгсэн хэр нь цагдаагийн байгууллагын дүрэмт хувцас өмсөөд, цагдаагийн цолны цалин аваад явдаг байсан.
 
Тодорхой хэмжээний эсэргүүцэл ирсэн. Зарим нь “Наад хүн чинь гавьяат тамирчин хүн шүү. Чингис хаан одонт дуучин шүү дээ. Болох юм уу. Наад хүн чинь танай байгууллагын нэрийг гаргаж яваа шүү” гэж байсан.
 
Гэтэл бид шударга ёсны зарчимтай байх ёстой. Ажил хийж цагаа бүртгүүлээд үр дүн гаргаж байгаа хүн цалингаа авах ёстой. Харин цагдаагийн байгууллагын нэрээр явж байгаа нь ардчилсан нийгэмд байх ёсгүй.

Би ажлаа аваад цагдаагийн дарга нарыг сонгон шалгаруулалтаар ил тод шалгаруулдаг болсон. ХЗДХ-ийн сайд О.Алтангэрэл надтай уулзаад "Би томилгоонд огт оролцохгүй. Аймгуудын цагдаагийн дарга нарыг томилохдоо тухайн аймгийн иргэн биш  хүнийг томилбол үр дүнтэй" гэснээс өөр зүйл хэлээгүй. Өмнөх сайд нар болох Б.Энхбаяр, Х.Нямбаатар нар ч цагдаагийн томилгоонд огт оролцоогүй.  
 

Комедиан, хөтлөгч Д.Амартүвшин "Ноорог креатив студио"-той холбоотой асуудлаар байр сууриа илэрхийлэв.

-Өнгөрсөн долоо хоногт ЦЕГ-ын дарга Т.Сүхболд NTV телевизийн "Лхагвын тойм" нэвтрүүлгээр ярилцлага өгч их гоё зүйлс ярьсан. Тэр хүний ярьсан микрофон дээрх шүлс хатаагүй байхад л цагдаа нар ийм зүйл хийж байна. Баримтат киноноос айсан тул эрх баригчид цагдаа нараар ийм зүйл хийлгэлээ. Хөдөө сонгуулийн луйвар цагаандаа гарсан гэсэн шүү дээ.

Ямар ч тэмдэглэл хийлгүйгээр ноорог-ын залуусын олон зүйлийг нь хураан авчээ. Эдгээр залуусыг тагнаж чагнасан байх эрсдэлтэй. Цагдаа нар Үндсэн хуульд тангараг өрдөг болохоос улс төрчдөд тангараг өргөдөггүй. Үндсэн хуулийг зөрчиж, хүний үг хэлэх үзэл бодлоо илэрхийлэх эрхийг нь зөрчлөө. Цагдаа нар өөрсдөөсөө ичээч ээ.

Улс төрчдийн өөдөөс үгүй гэж хэлж сураач ээ. Юнителтэй хамтарч ажиллалаа гээд эднийх гэсэн үг биш. Энэ компанитай хамтарч ажилладаггүй контент бүтээгч гэж байхгүй. Би ч хамтарч ажилласан удаатай. Монгол ардчиллаас дарангуйлал ру у шилжих биш бүр шилжчихсэн байна. 

Бид ардчиллын индексээр автократ улсуудтай адилхан болчихлоо. Энэ байдлыг удаан үргэлжлүүлэхгүйн төлөө явах ёстой. Өнөөдөр энд маш олон сэтгүүлч ирсэнд би баяртай байна. Яагаад гэвэл та бүхний ажиллах орчин улам эрсдэлтэй, аюултай болж байна гэв.