- "Катар 2022" ДАШТ-д оролцох шигшээ багуудын бүрэлдэхүүнийг цувралаар танилцуулъя -

Аргентин улсын шигшээ баг "Катар 2022" хөл бөмбөгийн ДАШТ-д оролцох шилдэг 26 тоглогчоо зарлалаа. Дасгалжуулагч Лионел Скалони хамт ажиллаж дадсан Анхел Ди Мариа, Николас Отаменди тэргүүтнийг багтаа дууджээ.

Харин Алехандро Гарначо, Жиованни Симеоне болон бэртэлтэй байгаа Жиованни Ло Селсо нарыг үлдээсэн байна.

10-р сараас хойш бэртэлтэй байсан Пауло Дибалаг ДАШТ-ий үеэр тоглох боломжтой хэмээн авч явсан ба түүнтэй хамт довтолгоонд Манчестер Сити клубийн Жулиан Альварез зогсох нь.

Өнгөрсөн зун Өмнөд Америкийн аварга болсон бүрэлдэхүүнээс 21 тоглогч энэ удаа Катарыг зорих бол Лионел Месси тав дахь ДАШТ-дээ оролцоно.

Багийн хамгийн ахмад тоглогч нь 36 настай хаалгач Франко Армани бол хамгийн залуу нь 21 настай хагас хамгаалагч Энцо Фернандез юм. Багийн дундаж нас 27.9 байна.

Энэ 26 тоглогч ДАШТ-ий C хэсэгт Саудын Араб, Мексик, Польшийн шигшээ багтай тоглоно.